7, ఫిబ్రవరి 2008, గురువారం

చలం-ఒక సమీక్ష (మూడవ భాగం)

ప్రజల సొమ్మును కోట్లాది రూపాయలు కాజేసి, ముందు తను తన కుటుంబ భద్రతను కాపాడుకుని, ఆనక ప్రజాసేవ అంటూ శ్రీరంగనీతులు చెప్పే వారిని ప్రజలు వోట్లు వేసి మరీ తమ నాయకులుగా ఎన్నుకుంటున్నారు. ఇటువంటి ప్రజలకు అంతటి త్యాగశీలి ఐన చలం లాంటి వారు ఎన్ని యుగాలకొక్కడు దొరుకుతాడు.

చలం నిస్సంశయంగా యుగపురుషుడు. చలం భారతదేశానికి స్త్రీవాద పితామహుడు. చలం కేవలం స్త్రీవాదే కాదు. ఆయన కుటుంబజీవితం మొత్తం ప్రక్షాళింపబడాలని కోరుకున్నాడు. అందుకు అతని 'బిడ్డల శిక్షణ ' గ్రంథమే తార్కాణం. చలం ఒక వ్యక్తిత్వ వికాస నిపుణుడు. వ్యక్తియొక్క ఆలోచనావిధానంలో మరియు వ్యక్తి యొక్క ప్రవర్తనలో ఎన్నో కోణాలను ఆవిష్కరించి వాటిలో ఎంతో మార్పుని చలం కోరుకున్నాడు. చలం ఒక తాత్వికుడు. మానవ జీవితానికి అసలు అర్ధం ఏమిటని, మానవజీవన లక్ష్యం ఏమిటని తరచి తరచి ఆలోచించి, అన్వేషించి చివరకు మానవజీవితాదర్శం శాంతియే అని కనుగొన్నాడు. యశోసంపదలను యెడమ చేత్తో....కాదు యెడమ కాలితో తన్నిన ఉన్నతుడు చలం.

చలం తన జీవితంలో ఎంతో సాంఘిక బహిష్కరణను, ఎంతో పేదరికాన్ని కూడా ఎదుర్కొన్నాడు. ఐనా కూడా తను ఏం చెప్పాడో తదాచరణకే కట్టుబడ్డాడు. చలం మూలంగా ఇంత ఉద్యమం, ఇంతటి సంచలనం, సమాజంలో ఇంతటి కదలికా చూసిన తరువాత ఇదంతా కేవలం ఒక వ్యక్తి చేసినదా అని ఎవరైనా విస్మయం చెందక మానరు. ఏ గొప్ప ప్రజాసమూహమో, లేక తన వేలాదిమంది అనుచరులతో ఏ గొప్ప నాయకుడో గానీ ఇటువంటి ఉద్యమాన్ని నిర్మించలేడు. కానీ చలం కాగితం, కలం ద్వారానే ఇంతటి కదలికను సమాజంలో తీసుకువచ్చాడు. ఉద్యమ రథానికి చక్రం, ఇరుసు కూడా తానే అయి నిలిచాడు. అందుకే అంతగా నలిగిపోయాడు.

భరత ఖండపు ఉత్తరాదిన ఆ హిమాచలం, తెలుగు వారి గుండెల్లో ఈ గుడిపాటి వెంకటాచలం ఆచంద్రతారార్కం నిలిచి ఉండేవారే. ఆయన హృదయాన్ని తెలుసుకోకుండా వ్యక్తీకరణలోని దోషాన్ని పట్టుకుని ఆయనను విమర్శించటం అవగాహనలేని తనమే. నిద్రపోతున్న జడసమాజాన్ని చలం తట్టిలేపాడనటం కన్నా కొట్టి లేపాడనటం సబబుగా ఉంటుంది. కందుకూరి, గురజాడల ఉద్యమాలు కొన్ని ప్రాంతాలకే, కొన్నివర్గాలకే పరిమితమయ్యాయి. పెక్కుమంది వారి అభిప్రాయాలను వ్యతిరేకిస్తూ, కొందరు అసలవేవీ పట్టకుండా తమ మూర్ఖత్వాన్ని తాము కొనసాగిస్తూనే ఉన్నారు. అటువటి వారదరికీ చలం తొడపాశం పెట్టాడు. చలం రచనలు,చలం భావాలు, చలం ఉద్యమం ఆంధ్ర దేశం మూలమూలలకూ చేరాయి. చలం కన్నా ముందే ప్రారంభమై నత్తనడక నడుస్తున్న సామాజికమార్పుని చలం వేగిరం చేసాడు.(సమాప్తం)

3 కామెంట్‌లు:

  1. ఆయన హృదయాన్ని తెలుసుకోకుండా వ్యక్తీకరణలోని దోషాన్ని పట్టుకుని ఆయనను విమర్శించటం అవగాహనలేని తనమే.

    chala bavundandi

    రిప్లయితొలగించండి
  2. అద్బుతమైన వ్యాసం అందించారు. అభినందనలు.

    రిప్లయితొలగించండి