22, జులై 2020, బుధవారం

యోగభావనలు (Concepts of Yoga ) - 9





Physical Result - Potential Result



మనం ఒక పని చేసినపుడు దానికి రెండు రకాల ఫలితాలు ఉంటాయి.

ఒకటి Physical Result.

ఇది పైకి కనిపించే ఫలితం. దీని వలన కలిగే లాభనస్టాలను మనం తక్షణం పొందుతాము. అసలు ఎవరైనా దీనికొరకే ఏ పనినైనా చేస్తారు. 

రెండవది Potential Result.

ఇది పైకి కనిపించదు. వివేకవంతులు మాత్రమే దీనిని చూడగలరు. దీని వలన కలిగే లాభనస్టాలను మనం కొంతకాలం గడిచిన తరువాత పొందుతాము. అప్పటి వరకు ఇది Reserve రూపంలో ఉంటుంది. కానీ ఇదే అసలైన ఫలితం. మన తలరాతను నిర్దేశించే ఫలితమిదే.

కనుక ఏపని చేసినా ముఖ్యంగా Potential Result మీద దృష్టి ఉంచి ఆపని చేయాలి.

ఓ పని చేసినపుడు Physical Gain ఒక వంతు ఉండి Potential Loss నాలుగు వంతులు ఉందనుకోండి. ఆపనిని ససేమిరా చేయకూడదు.

కానీ Vision లేనివారు Potential Formలో ఉండే లాభనష్టాలను చూడలేరు. వారు పైకి కనిపించే Physical Gain మాత్రమే చూసి ఆ పనిని చేస్తారు. కానీ కాలాంతరంలో నష్టపోతారు.

ఉదాహరణకు ఓ సంసారి అద్దె ఇంట్లో ఉంటున్నాడు. అతడు అద్దె కొంచెం ఎక్కువ పెట్టి, ఓ మంచి ప్రదేశంలో ఇల్లు తీసుకోగలిగిన స్థోమత ఉండి కూడా తక్కువ అద్దె అనో, పని ప్రదేశానికి దగ్గరనో మంచి వాతావరణం కాని చోట ఇల్లు తీసుకున్నాడనుకుందాం.

దాని వల్ల అతనికి మిగిలే డబ్బు అతడి Physical gain.

కానీ అక్కడి చెడు వాతావరణం వలన అతడికి కలిగే నష్టం Potential loss.

ఈ నష్టం అతడికి కలిగే కొద్ది లాభం కన్నా చాలా ఎక్కువగా ఉంటుంది. అతడి పిల్లలు చెడు సావాసాలకు లోనౌతారు. దురలవాట్లకు బానిసలౌతారు. తమ భవిష్యత్తును పాడు చేసుకుంటారు. చివరకు అతడి కుటుంబమే అస్తవ్యస్తమైపోతుంది.

అలాగే మరో ఉదాహరణ.

ఓ ఇల్లాలు ఆఫీసుకు పోయి ఉద్యోగం చేస్తే ఆమెకు వచ్చే జీతం ఆమె Physical gain.

గృహిణిగా ఇంట్లో ఉండి తన పూర్తి సమయాన్ని తన కుటుంబ సభ్యుల కొరకు వినియోగిస్తే ఆమె ఉద్యోగం చేయడంద్వారా కలిగే ఆర్దిక ప్రయోజనాన్ని కోల్పోతుంది. కానీ అంతకు మించి ఎన్నోరెట్లు Potential gain ఆ కుటుంబం మొత్తానికీ కలుగుతుంది.

కనుక ఏమి చేయాలనేది ఈ రెండింటినీ దృష్టిలో ఉంచుకొని నిర్ణయించుకోవాలి. స్థోమత గనుక ఉంటే ఏ ఇల్లాలి కైనా గృహిణీధరాన్ని నిర్వర్తించడమే లాభదాయకం.

ఓ దురాశాపరుడైన వ్యాపారి నాణ్యతలేని సరుకులు, కల్తీ సరుకులు అమ్మినపుడు అతడికి కొంత ఆర్థిక ప్రయోజనం కలుగుతుంది. కానీ అతడు చేసినది తప్పు కనుక ఆ Physical gain కన్నా ఎన్నోరెట్లు Potential lossను అతడు మూటకట్టుకుంటాడు. కాలాంతరంలో ఆ నష్టాన్ని అతడు అనుభవించక తప్పదు.

(Physical Result, Potential Resultలలో ఒకటి gain అయితే రెండవది loss అవుతుందనేం లేదు. 

అలానూ జరగవచ్చు, లేదంటే రెండూ gain అవవచ్చు, లేదంటే రెండూ loss కూడా అవవచ్చు. సందర్భాన్ని బట్టి ఎలాగైనా జరగవచ్చు.

ఉదాహరణకు విద్యార్జన చేయడం వలన Physical gain మాత్రమే కాదు, Potential gain కూడా ఉంటుంది. 

అలానే చెడుస్నేహాలవలన Physical loss మాత్రమే కాదు, Potential loss కూడా ఉంటుంది. )

ఓ పని చేసినపుడు తక్షణం సిద్దించే ప్రయోజనం (Physical gain) స్వల్పమైనదే కాక కొద్ది కాలం మాత్రమే ఉంటుంది. కానీ ముందు Potential from లో Reserve గా ఉండి కాలాంతరంలో మనకు సిద్దించే ప్రయోజనం ఎన్నో రెట్లు ఎక్కువగా ఉండటమేకాక చిరకాలం నిలచి ఉంటుంది.

కనుక పైకి కనిపించే లాభం మీద, తక్షణం సిద్దించే ప్రయోజనం మీద కాక కాలాంతరంలో అనివార్యంగా సిద్దించే, ఎన్నోరెట్లు ఎక్కువగా ఉండే ఫలితాన్ని దృష్టిలో ఉంచుకొని అందుకు అనుగుణంగా ఏ పనినైనా చేపట్టాలి.

కర్మసిద్ధాంతం నమ్మేవారు ప్రారబ్దం అన్నా, సంచిత ఫలం అన్నా వారు మాట్లాడుతున్నది Potential Result గురించి మాత్రమే.

జనసామాన్యం పాపం-పుణ్యం, ఖర్మ, తలరాత అన్నప్పుడు కూడా వారు మాట్లాడుతున్నది  Potential Result గురించి మాత్రమే.

కాకపోతే ఆ మాటలను తరతరాలుగా వినీ వినీ అలవాటైపోయి వాటిని మూఢత్వంగా భావించడం మనకు మామూలైపోయింది.

వాటిని నమ్మేవారు కూడా పరిమితార్థంలోనే వాటిని అర్థం చేసుకుంటున్నారు.

యోగభావనలన్నీ ప్రతి భారతీయుడికీ కొట్టిన పిండి. కాకపోతే వాటిని శాస్త్రీయంగా, ఓ క్రమపద్దతిలో అధ్యయనం చేయకుండా పడికట్టు మాటలరూపంలో వినడంవలన ఇలాంటి పరిస్థితి దాపురించింది.  





4, జులై 2020, శనివారం

యోగ భావనలు (Concepts of Yoga) - 8






VISIBLE SUCCESS – INVISIBLE SUCCESS




visible success is conditional 


లోకానికి ప్రకటించే విధంగా లేక ఇతరులు గుర్తించే విధంగా ఉన్న విజయాన్ని visible success అనవచ్చు. ఇలాంటి విజయం కోసం ఈ లోకంలో అనేక మంది అర్రులు చాస్తుంటారు. మరి దీనిని ఎలా సాధించాలి. 

దీనికోసం ప్రయత్నం చేసినంత మాత్రాన ఇది లభించదు. ఇది అనేక షరతుల మధ్యన మనకు దొరుకుతుంది.

ఆ షరతులేవంటే

మనలో Potentiality ఉండాలి. 

ఉండగానే సరిగాదు,………. అది తగినంత పరిమాణంలో (తగినంత స్థాయిలో) ఉండాలి.

అది గూడా సరిపోదు, …………దానిని విజయంరూపంలోకి మార్చడానికి తగిన ప్రయత్నం చేయాలి. 

అది గూడా ఏదో ఓ రంగంలో ప్రయత్నిస్తే సరిపోదు. ……………మన స్వభావానుకూలమైన రంగంలో మాత్రమే ప్రయత్నించాలి. 

అప్పుడు మాత్రమే మనకు visible success దొరుకుతుంది.

ఏవరిలోనైనా తగినంత Potentiality అనేది దీర్ఘకాలంలో మాత్రమే accumulate అవుతుంది. అది కూడా క్రమశిక్షణాయుతమైన జీవితం గడిపినప్పుడు మాత్రమే.

ఇన్నిషరతుల మధ్యన లభించే విజయం కొరకు మన ఆకాంక్షలమేరకు ప్రయత్నించడం అనేది మూర్ఖత్వం.

invisible success is unconditional

Potentiality కొరకు ప్రయత్నించినపుడు మాత్రం మనం బేషరతుగా సఫలీకృతులమవుతాము. దీనికొరకు క్రమశిక్షణాయుతమైన జీవితం చాలు. visible success కొరకు ఆత్రపడకుండా సహనంతో ఉంటే చాలు. 

మనలో పెంపొందుతున్న Potentiality మనకూ కనబడదు, ఈ లోకానికి కూడా కనపడదు. అందుకే దానిని సాధించడం అనేది Invisible Success.

మనం Potentiality సాధించిననాడే Success అయినట్లు లెక్క. Visible Success సాధించిన రోజు దానిని మనతోపాటు లోకం కూడా గుర్తిస్తుంది అంతే.

మన focus అంతా Potentiality accumulation మీద మాత్రమే ఉండాలి. మన సమయాన్ని అందుకొరకు మాత్రమే వెచ్చించాలి. Visible Success గురిచి పట్టించుకోకూడదు. ఎందుకంటే నీలో  తగిన Potentiality గనుక ఉంటే విజయం సహజసిద్ధమైన రీతిలో లభిస్తుంది, అప్రయత్నంగా లభిస్తుంది, దానంతటదే లభిస్తుంది. ఒకవేళ నీలో తగినంత Potentiality గనుక లేనట్లైతే నీవు ఎంత ప్రయత్నించి నా విజయం నీదరికి రాదు. కనుక దాని మీద దృష్టి పెట్టడం వ్యర్థం.

ఓ సారి విజయం లభించిన తరువాత కూడా నీవు దానిమీద దృష్టిపెట్టవలసిన పనిలేదు. దొరికిన విజయాన్ని పదిలపరచుకోవడం, మరింత విజయం పొందడం గురించి నీవు ఆలోచించవలసిన అవసరమే లేదు.  నీవు ఎల్లప్పుడూ నీ Potentiality పెంపు చేసుకోవడం మీద మాత్రమే దృష్టి పెట్టాలి.

అలా గనుక నీవు ఉన్నట్లైతే నీకు నీ జీవితంలో కొంత కొంత విరామంతో మరలా మరలా (time and again) విజయం లభిస్తూనే ఉంటుంది. 

అలాంటి విజయం ఏ స్థాయిలో ఉంటుందంటే నీవు కోరుకోవడానికి కూడా సాహసించనంతటి స్థాయిలో ఉంటుంది. నీవు కలగనడానికి కూడా ధైర్యం చేయలేనంతటి స్థాయిలో ఉంటుంది. నీవు లక్ష్యంగా నిర్దేశించుకున్న విజయం కన్నా ఎన్నోరెట్లు గొప్పగా ఉంటుంది.

Potentiality only matters, visible success doesn't matters

ఒకవేళ నీవు ఎలాంటి క్రమశిక్షణాయుతమైన గత జీవితం లేకుండా కేవలం Visible success మీద ఆశతో, దాని కొరకు ఆతురతతో ప్రయత్నించి సఫలీకృతుడైనట్లతే జన్మతః నీలో కొంత Potentiality ఉన్నట్లు లెక్క. అలాంటి సందర్భంలో ఆ Potentiality కాస్తా ఆ విజయంతో consume అయిపోతుంది. ఎటూ క్రమశిక్షణ లేదు కనుక ఆ ఒక్క విజయం కాలగతిలో fadeout అయిపోతుంది.

జీవితంలో జయాపజయాలు పొందడం అనేది వైకుంఠపాళి ఆట లాంటిది.ఈ ఆటలో మనం ఎంత క్రింది స్థాయిలో ఉన్నాకూడా మనలను అంతకన్నా పైస్థాయిలకు తీసుకువెళ్ళడానికి నిచ్చెనలుంటాయి. అలానే ఎంత పైస్థాయిలో ఉన్నాకూడా మనలను క్రింది స్థాయిలకు దిగలాడానికి పాములు ఉంటాయి. 

అలానే ఎన్ని విజయాలు పొంది, ఎంత ఉన్నత స్థానం చేరినాకూడా Potentiality అనేది accumulate అవడం ఆగిపోతే విజయాన్ని పొందడం అనేది అంతటితో ఆగిపోతుంది. విజయం పొదడం అనే ప్రక్రియ ఒకసారి ఆగిపోతే త్వరలోనే ఆ వ్యక్తి, లోకం దృష్టిలోfadeout అవడం అనేది జరిగిపోతుంది.

అలానే ఎన్నో అపజయాలెదురై ఎంతో క్రింది స్థాయిలో ఉన్నా కూడా మనలో సుగుణాలు గనుక ఉన్నట్లైతే కాలక్రమంలో Potentiality సంచయనం (accumulation) జరిగి అది విజయంగా రూపాంతరం చెందుతుంది.

కనుక మనం visible success మీద దృష్టి పెట్టడం మానేసి కేవలం potentiality accumulation మీద మాత్రమే దృష్టి (focus) పెట్టినట్లైతే, visible success అనేది మన జీవితంలో time and again సంభవిస్తూనే ఉంటుంది.

ఈ ప్రక్రియను మనం కేవలం మన ఆతురతకొద్దీ పాడు చేసుకుంటూ ఉంటాము.

ఇక చివరిగా కాలక్రమంలో Potentiality సంచయనం ఏకారణంగా జరుగుతుందో చెప్పుకుందాము.

క్రమశిక్షణ వలన అని చెప్పవచ్చు,

సుగుణాలవలన అని చెప్పవచ్చు,

విలువలతో కూడుకున్న జీవితం వలన అని చెప్పవచ్చు,

సాధన వలన అని చెప్పవచ్చు,

తపస్సు వలన అని చెప్పవచ్చు.

ఎలా చెప్పినాకూడా దీనిని సరైన అర్థంలో ఆచరించినప్పుడు మాత్రమే ఫలితం ఉంటుంది. పైన చెప్పిన మాటలకు ఎవరి అర్థాలు వారు చెప్పుకుని తమకు తోచిన అర్థంలో ఆచరిస్తే ఫలితం ఉండదు. కనుక ఆ సాధనా మార్గం గురించి సవివరంగా ప్రత్యేకంగా చర్చించుకుందాం. 





20, ఏప్రిల్ 2020, సోమవారం

యోగ భావనలు (Concepts of Yoga) - 7




SUCCESS CHAIN

WHERE IT STARTS AND WHERE IT ENDS



విజయం ఒక గొలుసు లోని చివర అనుకుంటే దాని మొదలు ఏది ? మద్య భాగాలు ఏవి?

అంటే ఏ చర్యా క్రమం అంతిమంగా విజయానికి దారితీస్తుంది?

ఆ క్రమం ఎక్కడ మొదలవుతుంది ? 

ఏ చర్యతో మొదలవుతుంది?

మరలా ఏ ఏ చర్యలగుండా ప్రయాణిస్తుంది?

ఆ క్రమం యొక్క స్వరూపం ఏవిధంగా ఉంటుంది?

ఏం చేస్తే విజయం లభిస్తుంది అనే ప్రశ్నకు సహజంగా అందరూ చెప్పే సమాధానం కష్టపడితే విజయం వరిస్తుంది అనే!

మరి కష్టపడినవారందరికీ విజయం లభిస్తుందా అంటే… లేదనేదే జవాబు!

మరి అలాగని కష్టపడకపోతే వస్తుందా అంటే….. అప్పుడూ కాదన్నదే సమాధానం!

మరి సరైన సమాధానం ఏమిటి అంటే కష్టపడినవారిలో కొందరికి విజయం లభిస్తుంది. 

అంటే కష్టపడినా కూడా కొందరికి విజయం లభించదనే కదా అర్థం.

అంటే కష్టపడటం అనేది విజయానికి మూలకారణమైతే కాదు

విజయాన్ని అందుకునే క్రమంలో కష్టపడటం, తద్వారా విజయం పొందటం అనేవేకాక ఇంకా ఏవో ఉన్నాయి. 

అంటే ఇవి రెండు కన్నా ఎక్కువ. 

ఈ క్రమంలో కష్టపడటం కన్నా ముందు వచ్చేది ఏమిటి. 

కష్టపడేవారిలో విజయానికి తగిన పొటెన్షియాలిటీ ఉన్నవారు మాత్రమే విజయాన్ని పొందుతారు. 

అంటే కష్టపడటం ఒక్కటే సరిపోదు.  తగిన పొటెన్షియాలిటీని or పొటెన్షియల్ రిజర్వ్ ని కలిగి ఉండాలి. 

అంటే success chain లో మూడో అంశం వచ్చింది. అదే కష్టపడటానికన్నా ముందే తగిన potential resreve ను కలిగి ఉండటం.  

మరి ఎవరైనా కష్టపడితే విజయం సిద్ధిస్తుంది అని మాత్రమే చెబుతారెందుకు.

ఈ పొటెన్షియాలిటి గురించి చెప్పరెందుకు.

ఎందుకంటే success chain లో కష్టపడటం, తద్వారా విజయాన్ని పొందటం అనేది మాత్రమే visible part. అతకన్న ముందు ఉండేదంతా invisible part.

ఆ కనపడని భాగాన్ని దర్శించలేనివారు దాని గురించి ఏమి చెప్పగలరు. 

అప్పటికీ కొందరు వేదాంత ధోరణిలో అదృష్టం, తలరాత, ప్రారబ్దం, గతజన్మ కర్మఫలం లాంటి వాదనలు చేస్తారు కానీ అవి అంత స్పష్టంగా, శాస్త్రీయంగా ఉండవు. 

ఆ వాదనలన్నీ ఈ ఆధునిక ప్రపంచంలో మూఢనమ్మకాలుగా కొట్టివేయబడతాయి.  

ఇక మిగతా చర్చను కొన్ని ప్రశ్నోత్తరాల రూపంలో కొనసాగిద్దాం

ఈ potential reserve వల్ల విజయం ఎలా వస్తుంది?

ఇది విజయపు పూర్వరూపం. ఈ reserve ప్రయత్నం లేక కష్టపడటం అనే మాధ్యమం ద్వారా విజయంగా రూపాంతరం (transformation) చెందుతుంది.

ఐతే ఈ potential reserve ఎక్కడనుండి వస్తుంది. ఎలా వస్తుంది?

ఇది కాలక్రమంలో నెమ్మదిగా పోగుబడుతుంది (accumulate). క్రమంగా పెరుగుతుంది. నిర్ణీత పరిమాణానికి చేరుకోగానే రూపాంతరీకరణకు (transformation) సిద్ధమవుతుంది.

ఇది ఇలా పోగుబడటాన్ని నిర్దేశించే అంశమేది?

మనం మంచి పనులు, మంచి ఆలోచనలు చేసినపుడు positive reserve పోగుబడుతుంది

చెడు పనులు, చెడు ఆలోచనలు చేసినపుడు negative reserve పోగుబడుతుంది

positive reserve, negative reserve లలో ఏది ముందుగా  నిర్ణీత పరిమాణానికి చేరుకుంటుందో అది ముందుగా రూపాంతరీకరణ చెందుతుంది.

positive reserve ఐతే విజయంగా మారుతుంది. negative reserve ఐతే పతనంగా మారుతుంది.

positive reserve సాధ్యమైనంత ఎక్కువగా పోగుబడేటట్లుగా ఎల్లప్పుడూ మంచి పనులు, మంచి ఆలోచనలు చేయడం; negative reserve సాధ్యమైనంత తక్కువగా పోగుబడేటట్లుగా అన్నివేళలా చెడు పనులు, చెడు ఆలోచనలకు దూరంగా ఉండటానికి ప్రయత్నించడం.... ఇదే సాధన!

మంచి చెడుల నిర్వచనమేది?

మంచి చెడుల గురించి ఎవరి వ్యక్తిగత అభిప్రాయాలు వారికి ఉంటాయి. వాటిని అనుసరిస్తే potential accumulation జరుగుతుందని చెప్పలేము. ఎక్కువ మంది మంచి చెడులను ధర్మాధర్మాల దృక్కోణంలో చూస్తారు. కానీ ఈ సాధనలో అలా కాక మంచి చెడులను బలం బలహీనతల దృక్కోణంలో చూడాలి. అది ఎలా అనేది ప్రత్యేక చర్చ.

ఈ మొత్తం చర్చ అనంతరం success chainను మనం ఈవిధంగా చెప్పవచ్చు. 

బలం బలహీనతల దృక్కోణంలో మంచి పనులను, మంచి ఆలోచనలను చేయడం, తద్వారా కాలక్రమంలో Positive potential ను accumulate చేసుకోవడం, అది నిర్ణీత పరిమాణానికి చేరుకున్న తరువాత దానిని ప్రయత్నపూర్వకంగా విజయంగా మార్చుకోవడం. ఇదీ క్రమం.






5, జులై 2019, శుక్రవారం

యోగభావనలు (Concepts of Yoga) - 6



పని - ఫలితం


మనం చేసే పనులకు రెండురకాలైన ఫలితాలు లభిస్తాయి. 

మొదటిది మనకు ప్రత్యక్షంగా కనిపించే ఫలితం. ఇది తక్షణం కార్యరూపం దాల్చుతుంది. అందరూ ఇది మాత్రమే ఫలితం అనుకుంటారు.

కానీ మరోరకమైన ఫలితం కూడా ఉంటుంది అది పైకి కనిపించదు. వెంటనే కార్యరూపం దాల్చదు.

మొదటిది Active and Visible Result

రెండవది Potential and Invisible Result

పైకి కనిపించని Potential Result మరలా రెండు రకాలుగా ఉంటుంది.

ఒకటి Positive Potential మరోటి Negative Potential 

ఇవి రెండూ వేరువేరు Reserves గా ఉంటాయి. అంటే వేటికవే ప్రత్యేకమైన నిల్వలుగా ఉంటాయి.

మనం నిరంతరం చేసే పనులకు తక్షణ ఫలితం ఎలా ఉన్నా వాటిలోని మంచి చెడులవలన ఈ రెండు రకాల Potential Results ఏర్పడతాయి. 

మనం చేసే పనిలోని మంచి Positive Potential రూపంలో Positive Reserve గా ఏర్పడుతుంది. ఆ తదుపరి చేసే పనులలోని మంచి కూడా Positive Potential గా మారి క్రమానుగతంగా దీనికి add అవుతుంది.  

అలాగే మనం చేసేపనులలో చెడు ఏమైనా ఉంటే అది Negative Potential రూపంలో Negative Reserve గా ఏర్పడుతుంది. ఆ తదుపరి చేసే పనులలోని చెడు కూడా Negative Potential గా మారి క్రమానుగతంగా దీనికి add అవుతుంది. 

కొంతకాలం ఇలా పెరుగుతూ పోయి ఆ Reserves నిర్దిష్ఠ పరిమాణానికి (Certain Quantity) చేరుకున్న తరువాత Potential & Invisible Form దశ నుండి Kinetic & Visible Form దశలోకి మారతాయి. అయితే ఇవి రెండూ ఒకే సారి మారవు. ఎందుకంటే ఇవి రెండూ ఒకే స్థాయిలో పెరగవు. ముందుగా Ripen Stateకు చేరుకున్నది ముందు మారుతుంది.

Positive Reserve and Negative Reserve ఈ రెంటిలో ఏది ముందుగా నిర్ధిష్ఠ పరిమాణానికి చేరితే అదే ముందుగా వ్యక్తీకరింపబడుతుంది.

ఏ వ్యక్తిలోనూ సాధారణంగా మంచి చెడులు సమానంగా ఉండవు. ఏదో ఒకటి ఎక్కువగా ఉంటుది కనుక అదే ముందుగా వ్యక్తీకరణ దశకు చేరుతుంది.

తక్షణం లభించే మొదటి రకం ఫలితం కొద్దికాలం మాత్రమే ఉంటుంది. కానీ దీర్ఘ కాలంలో పోగుపడిన Potential Reserve వ్యక్తీకరింపబడటం వలన కలిగే రెండవ రకం ఫలితం  దీర్ఘకాలం ఉంటుంది.

ఘనకార్యాలు ఎప్పుడూ Positive Potential వ్యక్తీకరింపబడటం వలన మాత్రమే సాధింపబడతాయి. కానీ అనేకమంది ఘనకార్యాలను ఎలాంటి Positive Reserveనూ కలిగిలేకుండా మొదటి రకమైన తక్షణ ఫలితం రూపంలో సాధించడానికి వ్యర్థ ప్రయత్నాలు చేస్తుంటారు.

అలాగే దుస్థితి కూడా ఎవరికైనా Negative Potential వ్యక్తీకరింపబడటం వలన మాత్రమే సంభవిస్తుంది.

పైన తెలిపిన విషయాలను అర్థం చేసుకోవడానికి కొన్ని ఉదాహరణలను చెప్పుకుందాం

సమానమైన అర్హతలు, సమానమైన అవకాశాలను కలిగిన ఇరువురు వ్యక్తులు జీవితంలో వృద్ధిలోకి రావాలని తలపోసి ఒకే చోట ఒకే రకమైన వ్యాపారాన్ని ప్రారంభించారనుకుందాం. వ్యాపారవిజయానికి ఇరువురూ చిత్తశుద్దితో ప్రయత్నిస్తున్నారు, ఇరువురూ సమానంగా కష్టపడుతున్నారు. ఇలాంటి పరిస్థితిలో వారు పొందే ఫలితాలెలా ఉంటాయో చూద్దాం.

వారిరువురూ తగిన పరిమాణంలో Positive Reserveను కలిగి ఉంటే ఇరువురూ విజయాన్ని పొందుతారు.

ఒకరు మాత్రమే కలిగి ఉంటే ఆ ఒకరు మాత్రమే విజయాన్ని పొందుతారు.

ఇరువురూ కలిగి లేకపోతే ఇరువురూ అపజయాన్ని మాత్రమే పొందుతారు.

ఏవరికి ఏస్థాయి Reserve ఉంటే వారు ఆ స్థాయి విజయాన్ని మాత్రమే పొందుతారు.

ఇక్కడ ప్రయత్నం అనేది నిమిత్తమాత్రమైనటువంటిది. కేవలం ప్రయత్నించినంతమాత్రాన ఇలాంటి విషయాలలో ఎవరూ విజయాన్ని పొందలేరు. అది చిత్తశుద్దితో కూడుకున్న ప్రయత్నమైనప్పటికీ.   

ఇలా ప్రయత్నిస్తున్న వారికి Positive Reserve లేకపోగా Ngative Resrve గనుక ఉంటే వారు ఆస్తులు కోల్పోయి అప్పులపాలై కష్టాల సుడిగుండం లోకి నెట్టివేయబడతారు.

కనుక కేవలం ప్రయత్నాన్ని నమ్ముకుని కార్యరంగంలోకి దూకితే ఫలితం దక్కుతుందనుకోవడం మూర్ఖత్వం. క్రమశిక్షణాయుతమైన గతజీవితం సుదీర్ఘంగా వున్నవారు మాత్రమే Positive Reserve ను కలిగిఉంటారు. వారు మాత్రమే తమప్రయత్నాలలో విజయాన్ని పొందుతారు. 

వ్యాపారమే కాకుండా విద్య, ఉద్యోగం, రాజకీయం, క్రీడారంగం, గ్లామర్ రంగం ఇలా దేనికైనా ఈ సూత్రం వర్తిస్తుంది.



7, నవంబర్ 2018, బుధవారం

యోగభావనలు (Concepts of Yoga) - 5



పుణ్యం - పాపం


భారతీయుల ఆలోచనా విధానంలోని ప్రముఖమైన భావాలలో పుణ్యం పాపం అనే భావన కూడా ఒకటి. పరపీడనను పాపకార్యంగా, పరోపకారాన్ని పుణ్యకార్యంగా చాలామంది భారతీయులు భావిస్తుంటారు. 

దానధర్మాలు చేయడం, గుళ్ళూ గోపురాలు కట్టించడం, తీర్థయాత్రలు చేయడం, నోములు, వ్రతాలు చేయడం మొదలైన పనులు పుణ్యకార్యాలనీ, ఇతరులకు అన్యాయం చేయడం పాపకార్యమనీ సాధారణంగా అందరు భావిస్తుంటారు.

సమాజంలో ఈ భావనలెలా ఏర్పడ్డాయో ఇప్పుడు తెలుసుకుందాం.

సదాచారణ, సద్గుణసంపత్తిద్వారా మానవుడు శక్తిని ఆర్జించడాన్ని యోగమార్గమంటారని మనం తెలుసుకున్నాం. ఈ సద్గుణసంపత్తినే పతంజలి మహర్షి  యమనియమాలని పేర్కొన్నాడు. 

ప్రేమ, సహనం, శ్రద్ధ, విధేయత, ఐకమత్యం, ఉదారత, మితాహారం, మితభాషణ మొదలైన సద్గుణాలను కలిగి ఉండటం, దురలవాట్లకు దూరంగా ఉండటం, క్రమశిక్షణ కలిగి ఉండటం, శుచిశుభ్రత పాటించడం, విద్యను, విజ్ఞానాన్ని ఆర్జించడం, నాగరికత అలవరచుకోవడం, కోపాన్ని జయించడం, స్త్రీలను, పెద్దలను గౌరవించడం, సత్సంప్రదాయాలను పాటించడం, కుటుంబ విలువలు, సామాజిక విలువలను పాటించడం ….ఇలా సద్గుణ సంపత్తి అనేది చాలా విస్తారమైన పరిధిని కలిగి ఉంటుంది.

పైన పేర్కొన్నటువంటి కొన్ని సదాచారాలను పాటించడం ద్వారా మానవుడు శక్తిని ఆర్జించడాన్ని ప్రాచీన భారతీయ ఋషులు తపస్సు అని అన్నారు. అలా ఆర్జించిన శక్తిని తపశ్శక్తి అనేవారు. ఈ ప్రక్రియనంతా వారు యోగమార్గంగా పేర్కొన్నారు. దీనికి పతంజలి మహర్షి యోగదర్శనం అనే శాస్త్రీయ రూపాన్నిచ్చాడు. నాటి భారతీయ సమాజం ఆ విలువలతోనే మనుగడ సాగించేది.

కాలక్రమంలో కొందరు దుర్మార్గులు శక్తి సముపార్జన కొరకు దగ్గర దారులను వెదకడం ప్రారంభించారు. ఈ మార్గాలను అనుసరించేవారు సులువుగా, స్వల్పకాలంలో శక్తివంతులౌతున్నారనే భావన వ్యాప్తిచెందడంతో ఎన్నో నియమనిష్ఠలతో కూడుకొని దీర్ఘకాలం పట్టే ఈ తపస్సును, సదాచారాలను, సద్గుణసంపత్తిని పాటించేవారి సంఖ్య క్రమంగా తగ్గిపోయి ఆయా దగ్గర దారులను అనుసరించేవారి సంఖ్య పెరిగిపోయింది. చివరకు భారతీయ సమాజం మొత్తం తపస్సు అనే సాధనకు దూరమైపోయింది.

ఈ దగ్గర దారులు అనేకం ఉన్నాయి. ఆయా దారులలో శక్తిని సముపార్జించడానికి కొందరు ప్రత్యేక సాధకులు బయలుదేరారు. వాటిని ఇంతకు ముందరి వ్యాసాలలో పేర్కొనడం జరిగినది. 

సాధారణ ప్రజలు మాత్రం పుణ్యం పాపం అనే దారిని ఎంచుకున్నారు. వారు పరపీడనను పాపకార్యంగానూ, దానధర్మాల్లాంటి పరోపకార కార్యాలనూ, దైవభక్తితో కూడుకున్న పనులను పుణ్యకార్యాలుగానూ భావించడం ప్రారంభించారు. ఇహ మిగిలిన అన్ని సద్గుణాలకూ క్రమంగా తిలోదకాలిచ్చారు. 

ఒక వ్యక్తిలో సుగుణాలు సహజ సిద్ధంగా ఉంటే తప్ప వాటిని సాధనలో భాగంగా అలవరచుకోవడం అనేది కనుమరుగైపోయింది. పైగా సహవాస దోషంతో (Social Osmosis) ఒకరి నుండి మరొకరు దుర్గుణాలను అలవరచుకొని సమాజంలో హెచ్చుభాగం దుర్గుణాలతో నిండిపోయింది. 





30, అక్టోబర్ 2018, మంగళవారం

యోగభావనలు (Concepts of Yoga) - 4




శీలము-బలము



సమాజంలో జీవనం సాగించే ప్రజలలో సింహభాగం బలాన్ని ఆర్జించడానికే కృషిచేస్తుంటారు. 

ఇక్కడ బలం అంటే ప్రాపంచికమైన ఆధిక్యం. యశస్సు, సంపద, విజయం, అధికారం మరియు భోగం; ఇవన్నీ ప్రాపంచికమైన అంశాలే, ఇవన్నీ కూడా బలం యొక్క వివిధరూపాలే. వీటిలోని ఏదో ఒక అంశంలో తమ ప్రస్తుత పరిస్థితిని మెరుగుపరచుకొని మరింత ఉన్నతమైన స్థానంలోకి వెళ్ళడానికి సాధారణ జన జీవన స్రవంతిలోని అందరూ ప్రయత్నిస్తుంటారు. 

కొందరు సిరిసంపదలను, కొందరు భోగభాగ్యాలను, కొందరు కీర్తిని, కొందరు అధికారాన్ని, కొందరు ఆధిపత్యాన్ని కొందరు విజయాన్ని సాధించడం కొరకు తమ జీవితంలో ఎక్కువ సమయాన్ని వెచ్చిస్తుంటారు. ఇలా చేయడం ఆక్షేపణీయం కాకపోగా అభిలషణీయం కూడా.

అయితే అందరూ శ్రమిస్తుంటారు, అందరూ కృషిచేస్తుంటారు, అందరూ తపిస్తుంటారు, అందరూ ఆరాటపడుతుంటారు కానీ కొందరే ఆశించిన మేర కృతకృత్యులవుతుంటారు. 

ఎందుకంటే ఆయా ప్రయత్నాలు చేసే వారందరిలో ఎక్కువమంది తత్విషయాల సాధన కొరకు పూర్తిగా ప్రయత్నాన్ని మాత్రమే నమ్ముకుంటారు.

భౌతిక బలసంపత్తి సాధనలోని తాత్వికత ఏమిటో వీళ్ళలో చాలామందికి తెలియకపోవడమే దీనికి కారణం.

భౌతిక బలసంపత్తికి మూలం శీలసంపద. మన ప్రయత్నాలననుసరించి శీలమే కాలక్రమంలో వివిధరూపాలలో ఉండే భౌతిక బలంగామారుతుంది. (Character becomes Destiny)అందుకే ప్రాపంచిక బలాన్ని సమకూర్చుకోవడానికి ఉద్దేశించిన యోగశాస్త్రాన్ని పతంజలిమహర్షి యమనియమాలనే పునాదుల మీద నిర్మించాడు. యమనియమాల సాధనంటే శీలనిర్మాణమే.

శీలమంటే సద్గుణ సంపత్తి, శీలమంటే మంచి నడవడిక, శీలమంటే క్రమశిక్షణ, శీలమంటే సదాచారం, శీలమంటే సత్సంప్రదాయం. .....ఇలా ఎన్ని రకాలుగానైనా శీలాన్ని మనం నిర్వచించవచ్చు. శీలస్వరూపాన్ని మనం విడిగా చర్చించుకుందాం. ఇప్పుడు దానికీ మరియు భౌతిక బలానికీ ఉండే సంబంధాన్ని మాత్రమే చర్చించుకుందాం.

శీలమంటే నేటి సమాజంలోని కొందరికి  చులకన, కొందరికి హేళన, మరి కొందరికి నిర్లక్ష్యం.

వయసులో ఉండగా అన్నీ అనుభవించి, ఇక ఏమీ అనుభవించలేని ముదుసళ్ళు చెప్పే శ్రీరంగనీతులుగా, జీవితంలో అనుభవించే అవకాశం లేనివారు పలికే చిలుక పలుకులుగా, జీవితమిచ్చే సుఖాలను అనుభవించడం చాతకాని చాదస్తపు మనుషుల ఆలోచనా విధానంగా చాలామంది శీలాన్ని గురించి చెప్పే మాటలను భావిస్తుంటారు.  

వీరి దృష్టిలో శీలమంటే ఏ గమ్యానికి చేర్చని ఒక మొండి రహదారిలో ప్రయాణం. జీవితంలో ఏ భాగ్యానికి మనలను నోచుకోనివ్వని ఒక శుష్క ప్రయత్నం. జీవితమిచ్చే అన్ని సుఖసంతోషాలను మననుండి లాగివేసుకొని మన బతుకును నిస్సారం చేసే ఒక చాదస్తపు వ్యధాభరిత ప్రయాస. కాబట్టి శీలం పేరుతో జీవితమందించే ఆనందాలను వదులుకోవడం మూర్ఖత్వం. 

ఇలాంటి ఆలోచనలతో వీరు జీవితంలో సద్గుణాలను అలవరచుకొని, శీలసంపత్తిని పెంచుకునే ప్రయత్నం ససేమిరా చేయరు. అయితే వీరికి ప్రాపంచికమైన బలసంపత్తి మాత్రం కావాలి. అందుకొరకు వీరు ఇంతకు ముందు చెప్పినట్లుగా ప్రయత్నం మీద మాత్రమే ఆధారపడతారు. అంటే బలంకావాలి, దానిని అందించే శీలం మాత్రం అవసరం లేదు. బలానికి మూలం శీలమని కాక ప్రయత్నమని భావించడమే దీనికి కారణం.

వీరు అమితంగా కోరుకుంటూ, అపరిమితంగా శ్రమిస్తూ, తమ జీవిత సమయంలో సింహభాగాన్ని ఏ భౌతిక బలసంపత్తి సాధనకొరకు వెచ్చిస్తారో, వేటిని సాధించడంలోనే తమ జీవితానికి సార్ధకత ఉందనుకుంటారో, వాటన్నింటికీ మూలం తమ శీలమేననీ, తమ సద్గుణ సంపత్తే కాలక్రమంలో తాము కోరుకునే భౌతిక బలసంపత్తిగా, ప్రాపంచిక విజయంగా మారుతుందనీ వీరు తెలుసుకోలేరు. ఈ ధోరణే వీరి అపజయాలకు మూలకారణం గా మారుతుంది. 

శీలానికీ, బలానికీ ఉండే ఈ సంబంధాన్ని ఏ మేరకు అర్థం చేసుకుని తదనుగుణంగా నడచుకుంటారో ఆమేరకు మాత్రమే….

……ఒకవేళ అర్థం చేసుకోలేకపోయినా కూడా సంత్సంప్రదాయాలవలన ఏమేరకు శీలవంతులుగా ఉంటారో ఆమేరకు మాత్రమే జీవితంలో ఎవరైనా భౌతిక బలసంపత్తి సాధనలో కృతకృత్యులౌతుంటారు.

ఇక్కడ ముఖ్యంగా ఒక విషయం చెప్పుకోవాలి. 

సమాజంలో కొందరు దుర్మార్గులు కూడా విజయవంతమైన జీవితాన్ని గడుపుతుంటారు. కనుక నడవడికకు, భౌతిక విజయాలకు సంబంధమే లేదని కొందరు వాదిస్తుంటారు. ఇది మరో చర్చ.  

వారు గతకాలపు సదాచారాలతో సాధించుకున్న బలసంపత్తిని సన్మార్గాన్ని విడనాడడం ద్వారా దుర్వినియోగం చేస్తూ, ఆ బలాన్నంతా పోగొట్టుకునే క్రమంలో ఉన్నారన్నదే వాస్తవం. వారి విజయాలన్నీ తాత్కాలికాలే. దీర్ఘకాలంలో వారు పతనం అవ్వడమేకాక తమను అనుసరిస్తూ అంటిపెట్టుకుని ఉండేవారికి కూడా దుర్గతి పట్టిస్తారు.

దీనికి మంచి ఉదాహరణ మన పురాణాలలోని అసురులు. వారు తపస్సు అనే సదాచారంతో సాధించిన బల సంపత్తిని దుర్మార్గపు పనులకోసం దుర్వినియోగం చేసి తుదకు అధోగతి పాలౌతుంటారు. 

అయితే సమాజంలో మనకు ఎదురయ్యే వ్యక్తులను మనం వారి జీవితంలో తుదికంటా పరిశీలించం. అప్పటికి వారేమి సాధిస్తున్నారో , వారేం చేస్తున్నారో, ఎలాంటి జీవితాన్ని గడుపుతున్నారో అంతవరకే చూస్తాం. కనుకనే మనకు అసలు తత్వం బోధపడదు.

మన నడవడికకు మెచ్చి ఏ దేవతో, ఏ దేవుడో మనకు వరమందించడం ద్వారా మనకు భౌతిక బల సంపత్తిని సమకూర్చరు. శీలమే బలంగా మారుతుంది. అది ప్రకృతి నియతి. ఇందులో ఏ దేవర ప్రమేయమూ లేదు.  ఎందుకంటే ప్రాపంచిక విజయపు పూర్వరూపం, మూల రూపం శీలం.

ఏ ఒక్కరూ కూడా ప్రాపంచిక విజయాన్ని ప్రత్యక్ష ప్రయత్నం ద్వారా సాధించలేరు. శీలసంపత్తి ద్వారా ప్రోదిచేసుకున్న మూలశక్తిని ప్రయత్నం యొక్క సహాయం ద్వారా తమకు కావలసిన రూపంలో ఉండే భౌతిక విజయంగా రూపుమార్చుకుంటారు ….అంతే. ప్రయత్నం అనేది ఈ మార్పిడికి ఉపయోగపడే ఒక సాధనం మాత్రమే. ఎంత ప్రయత్నించినా మూలశక్తి అనేదే లేనపుడు భౌతిక విజయంగా మనం దేనిని మార్చుకుంటాం. కనుకనే అటువంటి ప్రయత్నాలు వ్యర్థ ప్రయత్నాలుగా మిగిలిపోతాయి.

భౌతిక బలసంపత్తి సాధన కొరకు సమాజంలో దాదాపూ అందరూ ప్రయత్నిస్తున్నప్పటికీ కొందరే విజయం సాధించడానికి కారణం ఇదే.   

పైన వివరించిన నియమాన్ని ఎవరు ఏమేరకు తమ జీవితంలో పాటిస్తారో, ఆమేరకు మాత్రమే వారు విజయాలు సాధిస్తారు. ఒక్కొకరు ఒక్కో దశలో ఆగిపోతుంటారు, వారి సాధన మేరకే వారి విజయం కూడా ఉంటుంది. అందుకే సమాజంలో సాధారణమైన వ్యక్తులు ఎక్కువగానూ, గొప్ప విజయాలు సాధించిన వ్యక్తులు తక్కువగానూ ఉంటారు. మధ్యస్థ విజయాలు సాధించిన వ్యక్తుల సంఖ్య కూడా వారి సాధనను బట్టి ఈ ఇరువురికీ మధ్యన ఎక్కడో ఓ చోట ఉంటుంది.

ఈ సూత్రం ఒక వ్యక్తికే కాదు ఒక కుటుంబానికి, ఒక సంస్థకి, ఒక సమాజానికి, ఒక జాతికి, ఒక దేశానికి ....ఇలా ఎవరికైనా వర్తిస్తుంది.



25, సెప్టెంబర్ 2017, సోమవారం

యోగభావనలు (Concepts of Yoga) -3



శక్తి సముపార్జనా మార్గాలు


శక్తిని ఆర్జించే మార్గాలుగా భారతీయ సమాజంలో ఎప్పటినుండో కొన్ని పద్దతులు ప్రచారంలో ఉన్నాయి. 

ప్రాచీన భారతదేశంలో ఋషులు, మునులు శక్తిని ఆర్జించడానికి తపస్సును ఆచరించేవారు. దీనిని వారు స్వార్థం కోసం కాక లోకకళ్యాణం కోసం చేసేవారు. అసురులు మాత్రమే స్వార్థం కోసం చేసేవారు.  

కాలక్రమంలో ఆ సంప్రదాయానికి భారతీయ సమాజం దూరమైన తరువాత కొందరు దిగువ స్థాయి సాధకులు, కొందరు సిద్ధులు, మరికొందరు దుర్మార్గులు కలసి రకరకాల పద్దతులను శక్తి సాధనా మార్గాలుగా ప్రచారం చేసారు. చివరికి ఈనాడు ఈ సాధన జాతకాలు చెప్పి జీవనం సాగించే వారి వ్యాపకంగా మిగిలిపోయింది. దీనికి కారణం కొంత అవగాహనా లోపమైతే, కొంత దురాశ. 

'బ్రహ్మచర్యం' ద్వారా శక్తిని ఆర్జించవచ్చు అనేది ప్రాచీనకాలంనుండి ఉన్న ఒక సూత్రీకరణ. 

దీనిని ఆసరాగాచేసుకొని బ్రహ్మచర్యం అనేపదానికి సంభోగానికి దూరంగా ఉండటం అనే సంకుచితార్థం కల్పించి దానికి విపరీత ప్రచారం కల్పించారు. ఒక వ్యక్తి వివాహం చేసుకొని గృహస్థాశ్రమం స్వీకరించడానికి ముందుదశ బ్రహ్మచర్యం కాబట్టి ఆ అర్థానికి సమర్థన లభించినట్లయినది. నిజానికి బ్రహ్మచర్యం అంటే అనేక నియమనిష్ఠల సమాహారం. సంభోగానికి దూరంగా ఉండటం అనేది అందులో ఒకటి. అది కూడా అవివాహితులకు మాత్రమే ఆ నియమం బేషరతుగా వర్తిస్తుంది. గృహస్థులు కూడా బ్రహ్మచర్య వ్రతదీక్ష అవలంబించవచ్చు. ఐతే సంభోగానికి దూరంగా ఉండటం అనే నియమం అవివాహితులకు వర్తించినంత కఠినంగా గృహస్థులకు వర్తించదు. కానీ వీరి ప్రచారంవలన సంభోగానికి దూరంగా ఉంటే చాలు ఇంకెన్ని అవలక్షణాలను కలిగిఉన్నా బ్రహ్మచర్యదీక్షకు ఎలాంటి ఆటంకం కలగదనే అభిప్రాయం ఏర్పడింది. 

ఇంకొంత మంది మరింత ముందుకెళ్ళి వీర్యం స్ఖలించకుండా నిగ్రహించుకుంటే ఆ వీర్యం శక్తిగా మారుతుందనే ప్రచారం కల్పంచారు. ఇదే నిజమైతే మరి స్త్రీలెలా శక్తివంతులౌతారు. వీళ్ళదృష్టిలో శక్తిసముపార్జన మగవారికే పరిమితమన్నమాట; అసలు శక్తి స్వరూణిగా చెప్పబడే స్త్రీ ఇందుకు అనర్హులన్నమాట. వీరెంతకు దిగజారారంటే స్త్రీని శక్తిసాధనకు అనర్హురాలుగా ప్రకటించడంతో ఆగకుండా ఒక మగవాడు చేసే సాధనకు స్త్రీ ఒక ఆటంకం అనే అభిప్రాయాన్ని కూడా ప్రచారం చేశారు. ఇది మరింత సంకుచితమైన అర్థం.

యోగశక్తి అన్నివిధాలైన ప్రాపంచిక విజయాలకు మూలం. ఇది కలిగి ఉన్నవారు ఈ లోకంలో కార్యసాధకులై వర్ధిల్లుతారు.'వీర్యం' అనేది యోగశక్తికి పర్యాయపదం కనుక యోగశక్తి కలిగి ఉన్నవారిని వీర్యవంతుడు/రాలు అంటారు. యోగశక్తి కార్యసాఫల్యతకు దారితీసినట్లుగా పురుషుని రేతస్సు (semen) ఒక స్త్రీ గర్భసాఫల్యతకు దారితీస్తుంది కనుక ఆ రేతస్సును కూడా వీర్యమని పేర్కొనడం జరుగుతున్నది. ఇది కేవలం ఉపమానం మాత్రమే. అంతేకానీ వీర్యమంటే రేతస్సు అని కాదు అర్థం. కానీ ఈ అర్థాన్నే అనేకమంది వ్యాప్తిచేశారు. ఈ అర్థాన్ని బట్టే వారు రేతస్సు (వారి దృష్టిలో వీర్యం) స్ఖలించకుండా సంరక్షించబడితే అది యోగశక్తిగా మారుతుందని ప్రచారం చేశారు. 

ఇంత విడ్డూరమైన ప్రచారాలన్నీ శక్తి సాధనా మార్గంనుండి బుధజనులు తప్పుకొని దిగువస్థాయి వ్యక్తులు ప్రవేశించడం వలనే జరిగినది.

మరికొంత మంది ప్రాణాయామాన్ని శక్తి సాధనా మార్గంగా ప్రచారం చేశారు. 

వీరు చెప్పేదేమంటే మానవుని వెన్నెముక అథోభాగంలో 'కుండలిని' అనే శక్తి ఉంటుంది. అది చుట్టచుట్టుకిని నిదురించే సర్పాన్ని పోలి ఉంటుంది. వెన్నెముక మధ్య భాగంలో కటిస్థానంనుండి శిరస్సు యొక్క పైభాగం వరకూ ప్రయాణిస్తూ సుషుమ్న అనే నాడి ఉంటుంది. దానికి ఇరువైపులా ఇడ, పింగళ అనే రెండు నాడులుంటాయి. ఈ రెండు నాడులకు రెండు నాసికా రంధ్రాలకు సంబంధం ఉంటుంది. ఇడానాడి ఎడమ నాసికా రంధ్రం ఆధీనంలో ఉంటుంది. పింగళా నాడి కుడి నాసికా రంధ్రం ఆధీనంలో ఉంటుంది. ఆయా నాసికా రంధ్రాలద్వారా ఓ క్రమపద్దతిలో మార్చి మార్చి ఉచ్ఛ్వాస, నిశ్వాసాలను చేయడం ద్వారా ఇడాపింగళా నాడులద్వారా వెన్నెముక అధోబాగంలో ఉన్న కుండలిని మేల్కొని సుషుమ్నద్వారా ఊర్ధ్వగమనం చెంది శిరోభాగాన్ని చేరేక్రమంలో మానవుడు శక్తివంతుడవుతాడు. అతడికి అణిమ,గరిమ,లఘిమ మొదలైన ఎనిమిది మహిమాన్విత శక్తులు సమకూరతాయి. వీటిని 'అష్టసిద్ధులు' అని అంటారు. వీటిని సాధించినవాడిని సిద్ధుడు అని అంటారు.   

వీరు చెప్పే పద్దతిలో అష్టాంగయోగం రూపంలో యోగమార్గాన్ని వివరించిన పతంజలి మహర్షి ఉద్దేశం ఎంతవరకు నెరవేరుతుందో మనం చెప్పలేము. 

పతంజలి యోగదర్శనాన్ని యమం, నియమం, ఆసనం, ప్రాణాయామం, ప్రత్యాహారం, ధారణ, ధ్యానం మరియు సమాధి అనే ఎనిమిదిదశలుగా వివరించాడు. అందుకే ఇది అష్టాంగయోగంగా పిలువబడుతుది. ఆ ఎనిమిదింటిలో ప్రాణాయామం ఒకటి. 

అయితే యోగమార్గానికి యమనియమాలు పునాది వంటివి.

ఈ రెంటినీ శ్రద్ధగా పాటిస్తే మిగతా ఆరుదశలూ వాటంతటవే జరిగిపోతాయి. అంటే వీటి మధ్యన సంబంధం కార్యకారణ సంబంధం (cause & effect) అన్నమాట. యమనియమాలు కారణమైతే మిగిలిన ఆరుదశలు కార్యం. 

భారత స్వాతంత్ర్య సమర నాయకుడు గాంధీ 'యమం'లోని సత్యం, అహింసలనే తన జీవితాదర్శాలుగా గైకొన్నాడు. అయితే అనేకమంది యమనియమాలను నామమాత్రంగా ఉదహరించి ఆసనం, ప్రాణాయామం, ధ్యానం మొదలైన అంగాలను మాత్రమే శ్రద్ధగా సాధన చేస్తూ అదే యోగసాధనగా చెబుతుంటారు.

దీనికి కారణం మధ్యయుగాలలో కేవలం వీటికే అధిక ప్రాధాన్యతనిస్తూ 'హఠయోగం' అనే ప్రక్రియ తలయెత్తి జనబాహుళ్యంలో విస్తృతంగా వ్యాప్తిచెందింది. ఆ ప్రభవంతో నేటికీ యోగసాధన అంటే వివిధరకాలైన ఆసనాలు, వివిధరకాలైన శ్వాసించే పద్ధతులు, వివిధరకాలైన ధ్యానించే పద్ధతులు అని మాత్రమే భావించబడుతున్నది. వీటి మధ్యన యమనియమాలను గురించి ఆలోచించే తీరుబడి కూడా ఎవరికీ లేకుండా పోయింది.

శక్తి సముపార్జనకు కొందరు నవరత్నాలను ఉంగరాలుగా చేతివేళ్ళకు ధరిస్తుంటారు. రత్నాలనేవి అధిక శక్తికి కేంద్రాలుకనుక అవి ధరించినవారు శక్తివంతులుగా ఉండి కార్యసాధకులౌతారని దీని ఉద్దేశ్యం. 

మరికొందరు ఒక రాగిరేకుమీద యంత్రం గీసి కొన్ని మంత్రాలను ఉచ్ఛరించడంద్వారా అందులోకి శక్తిని ఆవాహన చేసి, అలా వచ్చిన శక్తిని ఆయంత్రంలో బంధించి ఇంటి ఆవరణలో ఏదో ఓ చోట దానికి గుప్తంగా దాచిపెడతారు. ఇక ఆ శక్తి ఆ ఇంటిని వదిలిపోదన్నమాట; దుష్టశక్తులేవీ దరిచేరవన్నమాట.

అంటే శక్తిని మనం సదాచారంద్వారా, సుగుణాలద్వారాకాక ఇలా రత్నాలను ధరించడం ద్వారా, యంత్రాలలో బంధించడంద్వారా సంపాదించడమన్నమాట.

భోగలాలసులైన రాజులు, జమీందారులలో సత్ప్రవర్తన, సదాచారం అనేవి కుందేటికొమ్ము లాంటివి. అటువంటివారివలనే ఇలాంటి చిట్కా మార్గాలు వ్యాప్తిలోకి వచ్చాయి.

కొందరు శక్తిని ప్రసన్నం చేసుకోవడానికి మానవదేహంలో శక్తికేంద్రాలైన మర్మాంగాలను పూజిస్తారు. వీరు పురుషాంగాన్ని, స్త్రీ యోనిని శిలలపై చెక్కి వాటిని పూజిస్తారు. వీరిని శాక్తేయులని పిలుస్తారు.

శక్తిని వశం చేసుకొనేది సిరిసంపదలకోసమే కనుక కొందరు ఇనుము వంటి విస్తారంగా దొరికే విలువ తక్కువ లోహాలను బంగారం వంటి అరుదైన, విలువైన లోహాలుగా మార్చి ధనవంతులవటానికి రసవాదాన్ని (Alchemy) ఆశ్రయిస్తారు.

ఇటీవలికాలంలో వ్యాప్తిలోకి వచ్చిన న్యూమరాలజీ కూడా ఈ కోవలోకే వస్తుంది. వారు ఒక వ్యక్తి పేరునులోని అక్షరాలను శక్తి ఆవాహనకు అనుకూలంగా మార్పు చేస్తారు. ఆ మార్పుతో అతడు శక్తివంతుడై కార్యసాధకుడు అవుతాడన్నమాట.

ఇప్పటివరకూ పేర్కొన్న మార్గాలన్నీ మంచిశక్తి లేక దైవశక్తి (Positive Energy) ని ఆర్జించే మార్గాలు. ఇవికాక దుష్టశక్తిని (Negative Energy) సాధించే పద్దతులకూడా లెక్కకు మిక్కిలి ఉన్నాయి. వాటి గురించి ఇక్కడ చర్చించడం అనవసరం. ఇవన్నీ కూడా యోగమార్గం లోని అనేకానేక ఉపశాఖలే.

ఈ మార్గాలన్నీ కూడా భారతదేశంలో ఋషులు, మునులు తపస్సు చేసే సంప్రదాయం కనుమరుగైన తరువాత కొందరు దిగువస్థాయి వ్యక్తులు, మరికొందరు దుర్మార్గులు వలన ఒకదాని తరువాత ఒకటిగా క్రమంగా భారతీయ సమాజంలోనికి ప్రవేశించాయి.

వీటిలో శాస్త్రీయత ఎంతన్నది, మూఢత్వం ఎంతన్నది, నైతికత ఎంతన్నది ఎవరికీ తెలియదు.

సదాచారమే శక్తి సముపార్జనకు సర్వోత్తమ మార్గం. ప్రాచీన భారతదేశంలోని ఋషులు ఒనరించిన తపస్సుయొక్క సారం కూడా అదే.

యమనియమాలంటే సదాచారం తప్ప మరేమీ కాదు.