భారతదేశానికి ఎటువంటి వ్యవస్థ కావాలి..?!---11

హోమ్‌పేజి

సామ్యవాద సిద్ధాంతం


సొంత ఆస్తి-కుటుంబం-రాజ్యం

మార్క్స్ తన గ్రంథాలలో ప్రవచించిన కమ్యూనిస్టు సిద్ధాంతం ప్రకారం మొదట్లో ప్రజలు ‘కమ్యూన్’ అనే సామాజిక వ్యవస్థలో జీవించేవారు. ఈ వ్యవస్థలో ఉన్నపుడు మానవునికి సొంత ఆస్తి, కుటుంబం, రాజ్యం ఇవేవీ ఉండేవి కావు. ప్రజలంతా ఎవరిపని వారు చేసుకొని దొరికిన ఆహారంతో బ్రతికేవారు. ఉత్పత్తి వనరులను ఎవరూ తమ వ్యక్తిగత ఆస్తులుగా ఉంచుకునేవారు కారు. ఎవరూ ఎవరిమీద దాడి చేసేవారు కాదు. వర్గాలు ఉండేవి కావు. కనుక వర్గ పోరాటం ఉండేది కాదు. దానితో పాలక(పీడక)వర్గం, పాలిత(పీడిత)వర్గాన్ని అణచటానికి ఉపయోగించే ‘రాజ్యం’ యొక్క అవసరం ఉందేది కాదు (సామ్యవాదం రాజ్యాన్ని ఇలానే అభివర్ణించింది). ఏ స్త్రీ ఏ ఒక్కరికీ స్వంతంకాదు. ఎవరు ఎవరితోనైనా సంతానం కనవచ్చు. కనుక కుటుంబాలు ఉండేవికావు. ఇటువంటి వ్యవస్థలో పీడన, దోపిడి ఉండేవికావు. ప్రజలంతా దేనికీ లోటు లేకుండా హాయిగా జీవించేవారు.

కానీ కాలక్రమంలో వ్యక్తి స్వార్థంతో స్వంత ఆస్తి కూడబెట్టడం ప్రారంభించాడు. దానితో సమాజంలో ప్రాబల్యం కలిగిన వ్యక్తులు మిగతా వారిని అణచి సమాజంలోని ఉత్పత్తి వనరులను తమ ఆస్తిగా ఉంచుకునేవారు. ఇలా ‘సొంత ఆస్తి’ ఏర్పడింది. అలా అణచటానికి సాధనంగా ‘రాజ్యం’ ఏర్పడింది. ఇలా కూడబెట్టిన ఆస్తిని తనదైన సంతానానికి వారసత్వ సంపదగా ఈయటానికి తనకు మాత్రమే సంతానాన్ని కనటానికి తనకు మాత్రమే స్త్రీ పరిమితమయ్యేటట్లుగా కుటుంబాన్ని ఏర్పరచుకున్నాడు. ఈ విధంగా సమాజంలో ‘సొంత ఆస్తి’, ‘కుటుంబం’, ‘రాజ్యం’ అనబడే వ్యవస్థలు ఏర్పడ్డాయి. మరో సమూహం దాడినుండి తన సమూహాన్ని రక్షించుకొనటానికి కూడా ‘రాజ్యం’ అనే ఆయుధం ఉపయోగపడింది.


వర్గ పోరాటం

సొంత ఆస్తి, కుటుంబం, రాజ్యం ఏర్పడటంతో సమాజంలో ఆర్థికంగా కొందరు బలవంతులుగా మరికొందరు బలహీనులుగా ఉన్న పరిస్థితి తలయెత్తి సమాజం రెండు వర్గాలుగా (Classes) విడిపోయింది. బలవంతులు తమ ప్రాబల్యం కోసం బలహీనులను రాజ్యం అనే సాధనంతో అణచి ఉంచటానికి ప్రయత్నించటంతో ఈ రెండు వర్గాల మధ్యన అనివార్యమైన సంఘర్షణ తలయెత్తి వర్గపోరాటం (Class Struggle) ప్రారంభమైనది.

ఈ వర్గపోరాటం వలన సమాజం అనేక మార్పులకు లోనై, అనేక పరిణామ దశలను దాటి నేటి రూపంలోకి వచ్చింది. ఇప్పుడు బూర్జువా వర్గానికి, కార్మిక వర్గానికి పోరాటం జరుగుతున్నది. ఈ వర్గపోరాటంలో కార్మిక వర్గం అంతిమంగా విజయం సాధించి సమాజంలో కార్మిక వర్గ నియంతృత్వాన్ని స్థాపించి స్వంత ఆస్తిని రద్దు (ఆస్తిహర్తల ఆస్తిహరణం) చేస్తుంది. తద్వారా సమాజంలో వర్గాలను నిర్మూలిస్తుంది. దానితో పాలిత వర్గాన్ని అణచటానికి తప్ప మరిదేనికీ పనికిరాని రాజ్యం నిరుపయోగమై డుల్లిపోతుంది (Withering Out of the State). దానితో అది కూడా రద్దౌతుంది. ఈ విధంగా ‘ఆధునిక కమ్యూన్ వ్యవస్థ’ ఏర్పడుతుంది. ఈ వ్యవస్థలో ఆదిమ కమ్యూన్ వ్యవస్థలో వలెనే ఎవరికీ ఆస్తులుండవు. వర్గాలు ఉండవు.రాజ్యం ఉండదు. అంతా సమానంగా ఉంటారు. ఎవరూ ఎవరినీ పీడించరు. అందరికీ వారి అవసరాలు సమృద్ధిగా తీరతాయి. కమ్యూన్ వ్యవస్థను ఆదర్శంగా భావించినది కనుక ఈ సిద్ధాంతానికి ‘కమ్యూనిజం’ అనే పేరు ఏర్పడింది.

గతితార్కిక భౌతికవాదం-చారిత్రక భౌతిక వాదం

ఆదిమ కమ్యూన్ వ్యవస్థ నుండి ఆధునిక కమ్యూన్ వ్యవస్థకు జరిగే ఈ మొత్తం పరిణామాన్ని గతితార్కిక తాత్త్విక విధానంలో కార్ల్‌మార్క్స్ వివరించాడు. ‘కాలగతిలో సమాజంలో మార్పు జరుగుతూ ఉత్పత్తి సాధనాలు మారినపుడు అది ఉత్పత్తి సంబంధాలలో మార్పునకు దారితీస్తుంది. ఆ మార్పు కొత్త ఉత్పత్తి సంబంధాలకు అనుగుణమైన వ్యవస్థ సమాజంలో ఏర్పడటానికి దారితీస్తుంది’ అని నిర్ధారించిన మార్క్స్ దానిని ఈ క్రింది విధంగా విశదీకరించాడు.

సొంత ఆస్థి, కుటుంబం, రాజ్యం ఏర్పడటంతో ఆదిమ కమ్యూన్ వ్యవస్థలో వర్గాలు ఏర్పడి మొదటగా బానిస వ్యవస్థ ఏర్పడింది. అంటే పాలక వర్గం చేతిలో ఆస్తి ఉండేది. అపుడు ఆస్తి అంటే ప్రధానంగా భూమి. సేద్య బానిసలు పనిచేసి ఉత్పత్తి చేసేవారు. ఈ బానిసలకు కూలి రూపంలోగానీ మరేరూపంలోగానీ డబ్బు చెల్లించబడేది కాదు. కేవలం బ్రతకడానికింత తిండి పడేసేవారు. రెండవది ఈ బానిసలకు పని చేయటం అనివార్యం. స్వేచ్ఛ ఉండేది కాదు. తప్పనిసరిగా తమ యజమాని వ్యవసాయ క్షేత్రంలో బ్రతుకంతా పనిచేసి తీరవలసినదే. ఈ వ్యవస్థలో వర్గాలు ‘సేద్యబానిస’ మరియు ‘బానిస యజమాని’. బానిస తిరుగుబాట్ల వలన ఈ వ్యవస్థ అంతరించింది. ఈ వ్యవస్థ యొక్క అవశేషాలు వెట్టిచాకిరీ రూపంలో నేటి సమాజంలో కూడా కనిపిస్తుంటాయి.

తరువాత కాలక్రమంలో ఫ్యూడల్ (భూస్వామ్య) వ్యవస్థ ఏర్పడింది. ఈ వ్యవస్థ బానిస వ్యవస్థ కన్నా కొంత పురోగామి స్వభావం కలిగినది. ఈ కాలంలో పీడిత వర్గ ప్రజలు వ్యవసాయం చేసేవారు కానీ వారు బానిసలు కారు; స్వతంత్రులే. అయితే సెంటు భూమికూడా లేని పేదవారు. అందువలన భూస్వామి వద్ద భూమి కౌలుకు తీసుకొని, చాకిరీ చేసి పండించి, కౌలుకింద ఆ పంటలో చాలా భాగం ఆ భూస్వామికే ఇచ్చేవారు.

ఈ విధంగా సమాజంలో ‘బానిస వ్యవస్థ’ నుండి ‘ఫ్యూడల్ వ్యవస్థ’ వరకూ పరిణామం జరిగింది. అప్పుడు ఫ్యూడల్ ప్రభువులే రాజులు. కానీ ఆ ఫ్యూడల్ సమాజంలో కాలక్రమంలో వచ్చిన మార్పుల వలన నూతన ఉత్పత్తి వనరులు ఏర్పడ్డాయి. అవే పరిశ్రమలు. ఫ్యూడల్ వ్యవస్థలో వస్తువులు కార్ఖానాలలో తయారవుతుండేవి. ఆ కార్ఖానాలు ఏమంత పెద్ద ఆస్తులుగా భావించబడేవి కావు. అపుడు ప్రధాన ఆస్తి భూమి మాత్రమే. కానీ ‘పారిశ్రామిక విప్లవం’ వచ్చిన తరువాత వస్తూత్పత్తి పెద్ద పెద్ద పరిశ్రమలలో జరగటం, వాటి వ్యాపారం ఖండాంతరంగా జరగటంతో అవి భూములను మించిన ఉత్పత్తి సాధనాలుగా పరిణమించాయి. అంటే సమాజంలో ఉత్పత్తిసాధనాలలో మార్పు వచ్చింది. మొదట్లో ఈ మార్పు ఫ్యూడల్ వ్యవస్థ పరిధిలో వృద్ధిచెందింది. ఫ్యూడల్ వ్యవస్థకు ఆధారభూతమైన ఫ్యూడల్ ఉత్పత్తి సంబంధాలు వేరు. ఈ ఆధునిక పరిశ్రమలతో కూడుకున్న ఉత్పత్తి సంబంధాలు వేరు. ఆ వర్గాలు వేరు, ఈ వర్గాలు వేరు. ఫ్యూడల్ వ్యవస్థలో వర్గాలు ‘భూస్వామి’ మరియు ‘పేదరైతు’. పారిశ్రామిక వ్యవస్థలో వర్గాలు ‘బూర్జువా పారిశ్రామిక యజమాని’ (పెట్టుబడిదారుడు) మరియు ‘కార్మికుడు’.

మొదట్లో ఫ్యూడల్ వ్యవస్థ పరిధిలో వృద్ధి పొందిన ఈ నూతన ఉత్పత్తి సంబంధాలకు ఆ వ్యవస్థ కాలక్రమంలో ఆటంకంగా పరిణమించింది. కనుక ఈ భూస్వామ్య వ్యవస్థను కూలదోసి తమ ఉత్పత్తి సంబంధాలకు అనుగుణమైన నూతన వ్యవస్థను ఏర్పరచటానికి బూర్జువా శక్తులు ప్రయత్నించి విజయాన్ని పొందాయి. అలా ఏర్పడిందే ‘పెట్టుబడిదారీ వ్యవస్థ’. దానికి అనుగుణంగా రాజకీయంగా పార్లమెంటరీ ప్రజాస్వామ్య వ్యవస్థ ఏర్పడింది. ఈ పెట్టుబడిదారీ వ్యవస్థ ఫ్యూడల్ వ్యవస్థ కన్నా పురోగామిశీలి. ఈ విధంగా సమాజం మరికొంత వృద్ధి చెందింది.

కార్మిక వర్గ నియంతృత్వం

పరిశ్రమలు విస్తరించటం వలన తిరిగి ఇప్పుడు కార్మిక వర్గం సంఖ్యాపరంగా అభివృద్ధి చెంది వారిలో చైతన్యం, ఐకమత్యం, రాజకీయ అవగాహన పెంపొందటం వలన కాలక్రమంలో ఈ కార్మిక వర్గం విప్లవాత్మకమైన క్రియాశీలతను సంతరించుకుంటుంది. కార్మిక వర్గం యొక్క శ్రమను దోపిడీ చేస్తున్న ఈ పెట్టుబడిదారీ వ్యవస్థ క్రమంగా ఆ వర్గం యొక్క మనుగడకు ఆటంకంగా పరిణమిస్తుంది. అప్పుడు ఈ పెట్టుబడిదారీ వ్యవస్థ కూల్చివేయబడి దోపిడీలేని వర్గరహితమైన నూతన వ్యవస్థ ఏర్పడుతుంది. కార్మిక వర్గం ఈ విప్లవానికి ఆధారభూతమై ముందుండి నడిపిస్తుంది. వర్గరహిత సమాజం ఏర్పడటానికి ముందు ‘కార్మిక వర్గ నియంతృత్వం’ స్థాపించబడి, సొంత ఆస్తి రద్దు చేయబడుతుంది.

ఈ విధంగా కార్ల్‌మార్క్స్ గతితార్కిక తత్త్వశాస్త్రం ప్రకారం ‘శాస్త్రీయ కమ్యూనిజం’ను వివరించాడు.

ప్రపంచ కార్మికులారా ఏకంకండి

ఈ మొత్తం పోరాటంలో కార్మికులకు ప్రధానమైన బలం ఐకమత్యం, ఏకాభిప్రాయం, సంఘటితమవడం. వారి ప్రధాన ఆయుధం ‘సమ్మె’. మొదట కార్మికులు అసంఘటితంగా ఉన్నపుడు వారు బూర్జువా పారిశ్రామిక యజమానుల దోపిడీ భరించలేక యంత్రాలను విరగగొట్టడం, తగులబెట్టడం లాంటి నిస్సహాయ చర్యలకు పాల్పడేవారు. కానీ కాలక్రమంలో తమలాంటి వారే అంతటా ఉన్నారని గ్రహించి అంతా ఒక తాటి మీదకు వచ్చి సంఘటిత పోరాటం చేయటంద్వారా ప్రయోజనం ఉంటుందని గ్రహించి అలా ఒక్కటిగా సంఘటితమౌతారు. అలా ఏర్పడినదే ‘కార్మికోద్యమం’ లేక ‘ట్రేడ్‌యూనియన్ ఉద్యమం’. ఈ ట్రేడ్‌యూనియన్లు తమ హక్కుల కొరకు పోరాడతాయి. ఒక ఫాక్టరీలోని యూనియన్‌లో ఆ ఫాక్టరీలోని కార్మికులంతా సభ్యులుగా ఉంటారు. తుదకు ఈ ట్రేడ్‌యూనియన్లన్నీ ఏకమై మొత్తం కార్మికవర్గమంతా ఒక్కటై పెట్టుబడిదారీ వ్యవస్థను కూల్చివేస్తుంది. ఈ లక్ష్య సాధన కొరకే కమ్యూనిష్టు ఉద్యమం సుప్రసిద్ధమైన ఈ క్రింది నినాదాన్నిచ్చింది.

‘ప్రపంచ కార్మికులారా ఏకంకండి. పోరాడితే పోయేదేమీలేదు మీ సంకెళ్ళు తప్ప’ ......(సశేషం)

హోమ్‌పేజి

భారతదేశానికి ఎటువంటి వ్యవస్థ కావాలి..?!---10

హోమ్‌పేజి

సామ్యవాద జననం


వ్యక్తి విలవిల-రాజ్యం వెలవెల

పెట్టుబడిదారీ వ్యవస్థలో ‘సమాజం’ యొక్క ప్రయోజనాలు మాత్రమే కాపాడబడ్డాయి. ‘వ్యక్తి’ మరియు ‘రాజ్యం’ ల యొక్క ప్రయోజనాలు నిర్లక్ష్యం చేయబడ్డాయి. ప్రధానంగా వ్యక్తి ప్రయోజనాల మీద ప్రత్యక్ష దాడి జరిగింది. దానితో వ్యక్తి ప్రమాదంలో పడినట్లుగా భావించబడింది. ధనవంతుడు పేదవాడిని దోచాడు. ధనిక దేశాలు బడుగు దేశాలను దోచాయి. సామాజిక పరమైన ఉత్పత్తివనరులన్నీ సమాజంలోని కొద్దిమంది ధనవంతుల చేతులలో స్వంత ఆస్తి రూపంలో కేంద్రీకృతమై మిగతా వారంతా ఆ ధనవంతుల ఉత్పత్తి వనరులలో అంటే ఫాక్టరీలలో కూలికి పనిచేసే కార్మికులుగా మిగిలిపోవలసిన పరిస్థితి ఏర్పడింది.ధనిక దేశాలు పేద దేశాలను ఆక్రమించి, తమ వలసలుగా చేసుకొని వాటిని తమ దేశ పరిశ్రమలకు ముడిసరకు సరఫరాదారులుగా, తమ ఉత్పత్తులకు మార్కెట్లుగా వాడుకున్నాయి.

ఫాక్టరీలలో పనిచేసే కార్మికులు పొద్దస్తమానం చాకిరీ చేయవలసి వచ్చేది. వారికి నిర్దిష్టమైన పనిగంటలు ఉండేవికావు. రోజుకి 18గం|| నుండి 20గం|| వరకు పనిచేయవలసి వచ్చేది. బ్రతకటానికి అదికూడా జీవచ్ఛవంలా బ్రతకడానికి సరిపడే కూలి మాత్రమే ఫాక్టరీ యజమాని చెల్లించేవాడు. కార్మికులకు ఏ విధమైన హక్కులూ ఉండేవి కావు. సమాజం ఎంతగా వికసించిందో వ్యక్తి అంతగా దోపిడీ చేయబడ్డాడు.

సామాజిక శక్తుల (బూర్జువా వర్గం) కార్యకలాపాలు మానవ జీవితాన్ని డామినేట్ చేసాయి. ఖండాంతర వాణిజ్యం, ఆధునిక యంత్ర సామాగ్రితో పెద్ద పెద్ద పరిశ్రమలు, నూతన విజ్ఞాన శాస్త్ర ఆవిష్కరణలు, నూతన శాస్త్రాల అభివృద్ది, ఆధునిక జీవన విధానం ఇత్యాది అన్నింటి ముందు రాజ్య శక్తి, ఫ్యూడల్ జీవన శైలి వెలవెల బోయాయి. పార్లమెంటరీ ప్రజాస్వామ్యం పేరుతో రాజ్యం సామాజిక శక్తులకు అంటే కొల్లదారీ బూర్జువా వర్గానికి కావలసిన పనులు చేసి పెట్టే బంట్రోతుగా మారినది.సమాజం ముందు రాజ్యం తన ప్రాబల్యాన్ని కోల్పోయింది.తన కార్యకలాపాల విస్తృతి ద్వారా రాజ్యాన్ని ‘సమాజం’ సులభంగా డామినేట్ చేసేసింది.

ఇంతకు ముందే చెప్పుకున్నట్లు దోపిడీ వ్యక్తి స్థాయిలోనే కాక జాతి స్థాయిలో కూడా జరిగింది. ధనవంతుడు పేదవాడిని దోస్తే, ధనిక దేశాలు అంటే ఆధునిక విజ్ఞాన శాస్త్ర ఫలితాలైన సాధనా సంపత్తిని కలిగిన దేశాలు వాటి సాయంతో అవిలేని బడుగు దేశాలను ఆక్రమించి దోపిడీ చేశాయి. ఐతే దీనివలన ఐరోపాలో జనించిన నూతన విజ్ఞాన శాస్త్రాలు, ఆధునిక నాగరికత, శాస్త్రీయ దృక్పథం మొదలైనవి ప్రపంచమంతటా వ్యాప్తిచెందాయి. ప్రపంచ ప్రజలందరూ తమతమ జాతి ఆలోచనా పరిధులనుండి బయటపడి ఈ నూతన భావాలను అందిపుచ్చుకున్నారు. ప్రపంచ ప్రజలందరి జీవన శైలిలో ఒక ఏకరూపత సాధించబడింది. ఈ వలస పాలన వలననే ప్రపంచమంతా ఒక్కసారిగా ఫ్యూడల్ దశనుండి అంతకన్నా పురోగామి అయిన ఆధునిక పెట్టుబడిదారీ దశలోనికి పరిణామం చెందింది.

అయితే నాణానికి మరోవైపుగా వ్యక్తి దారుణంగా దోపిడీ చేయాబడ్డాడు. సమాజం ఎంతగా వికసించిందో వ్యక్తి అంతగా అణగారిపోయాడు. వ్యక్తి ప్రమాదంలో పడ్డాడు. ‘సమాజం’ నుండి ‘వ్యక్తి’ని రక్షించటం తక్షణ కర్తవ్యం గా భావించబడింది. ఈ ఊపులో సమాజం లేక సామాజిక శక్తులవలన ప్రపంచానికి జరిగిన మేలు మరువబడింది. గతంలో రాజ్యం చేసిన మేలు మరచి అది చేసిన కీడును వ్యతిరేకిస్తూ సమాజం ఏవిధంగా విప్లవ పథంలో పయనించిందో ఈ సారీ అలానే సమాజం చేసిన మేలు మరువబడి అది చేసిన కీడుకు వ్యతిరేకంగా మానవుడు ఆలోచన చేయటం ప్రారంభించాడు. ఈ ఆలోచనలే క్రమంగా ‘సామ్యవాదం’గా పరిణమించాయి.ఈ సామ్యవాదం హేతువాద ప్రధానమైనది. అంటే పెట్టుబడిదారీ వ్యవస్థకు శాస్త్రీయ దృక్పథం ఎలానో సామ్యవాదానికి హేతువాద దృక్పథం అలాంటిది.

ఊహా స్వర్గం

ఈ ఆలోచనలు ప్రారంభంలో రాబర్ట్ ఓవెన్, చార్లెస్ ఫొరియెర్, సెయింట్ సైమన్ మొదలైన వారి ద్వారా జరిగాయి. సమాజంలో వ్యక్తి ఎవరి దోపిడీకీ గురికాకుండా తన హక్కులను అనుభవిస్తూ, మిగతా వారితో సమానంగా, ఆనందంగా బ్రతకాలని వీరు కాంక్షించారు. ఫాక్టరీ యజమానులు స్వచ్ఛందంగా మారాలని వీరు కోరుకున్నారు. స్వయంగా వీరు ఫాక్టరీలను స్థాపించి కార్మికుల శ్రేయస్సుకు పాటుపడుతూ మిగతా వారికి ఆదర్శంగా నిలవాలని ప్రయత్నించారు.

ఇటువంటి ఆలోచనలన్నీ ‘ఊహాస్వర్గ వాదం’(Utopia) గా భావించబడ్డాయి. ఇవి ఎటువంటి శాస్త్రీయ పద్ధతిలో జరగలేదు. ఊహాజనితంగా,’ఇలా ఉంటే బాగుండు’అన్న పద్ధతిలో జరిగాయి.

శాస్త్రీయ కమ్యూనిజం

అయితే కాలక్రమంలో ఇటువంటి ఆలోచనలన్నీ ఒక క్రమమైన రూపుదాల్చాయి.క్రీ||శ.1818వ సం||లో జర్మనీలో జన్మించిన కార్ల్‌మార్క్స్ అనే ఆర్థిక, రాజనీతి, తత్వశాస్త్ర వేత్త సామ్యవాద విచారధారకు ఒక శాస్త్రీయమైన రూపాన్ని ఇచ్చాడు. హెగెల్ అనే సుప్రసిద్ధ తాత్త్వికుని గతితార్కిక సిద్ధాంతం (Dialectic Theory) ప్రకారం ఈయన సామ్యవాదాన్ని శాస్త్రీయంగా వివరించాడు.’పెట్టుబడి’(Das Capital) అనే తన సుప్రసిద్ధ గ్రంథంలో ఆయన తన సిద్ధాంతాన్ని వివరించాడు. సమాజం ఏ విధంగా వర్గాలుగా విభజింపబడిందీ, పాలకవర్గం రాజ్యశక్తిని ఉపయోగించి పాలిత వర్గాన్ని అణచివేస్తూ దాన్నెలా దోపిడీ చేస్తున్నదీ, సమాజంలో ఉత్పత్తి సాధనాలను స్వంత ఆస్తిగా కలిగి ఉన్నవారు అమ్ముకోవటానికి శారీరక శ్రమ తప్ప మరేమీ లేని కార్మికులను ఏ విధంగా పీల్చిపిప్పిచేస్తున్నదీ, సమాజంలో ఉత్పత్తి సంబంధాలు ఏవిధంగా మానవ జీవితాన్ని నిర్దేశిస్తాయి మొదలైన విషయాలన్నీ కూలంకషంగా ఆ గ్రంథంలో చర్చించాడు.

ఈ గ్రంథం మానవుని సామాజిక జీవితాన్ని అత్యంత తీవ్రంగా ప్రభావితం చేసింది. మానవుని ఆలోచనా ధోరణిలో పెనుమార్పులు తీసుకువచ్చింది. మానవునికి తార్కిక దృక్పథాన్ని అంటే హేతువాద దృష్టిని అలవరచింది. ఈ గ్రంథం ప్రచురింపబడిన నాటినుండి నేటికాలం వరకు ఎవరు ఏవిధమైన ఆలోచన చేసినా దాని నేపథ్యంలో ఎంతోకొంత ఈ సామ్యవాద ఆలోచనాధోరణి ఛాయలు ఉండకపోవటం అరుదు. అంతగా ఈ గ్రంథంలోని విచారధార మానవుడిని ప్రభావితం చేసింది.

కమ్యూనిస్టు పార్టీ ప్రణాళిక

కార్ల్ మార్క్స్ తన సన్నిహితుడైన ఫ్రెడరిక్ ఎంగెల్స్ అనే తత్త్వవేత్తతో కలసి ‘కమ్యూనిస్టు పార్టీ ప్రణాళిక’(Communist Manifesto) అనే చిరు గ్రంథాన్ని కూడా 1848వ సం||లో రచించాడు. సామ్యవాద సాహిత్యంలో ఇది కూడా చాలా ప్రాముఖ్యత కలిగిన గ్రంథం. దీనిలో చరిత్రలోజరిగిన వర్గపోరాటక్రమాన్ని సంగ్రహంగా వివరించి అది అంతిమంగా కార్మికవర్గ నియంతృత్వానికి ఎలా దారితీస్తుందో వివరించి కమ్యూనిస్టు పార్టీ కార్యాచరణను సంగ్రహంగా వివరించటం జరిగినది......(సశేషం)

హోమ్‌పేజి

భారతదేశానికి ఎటువంటి వ్యవస్థ కావాలి..?!---9

హోమ్‌పేజి

పారిశ్రామిక విప్లవం-నూతన వైజ్ఞానిక ఆవిష్కరణలు

ఐరోపా ప్రజలలో ముఖ్యంగా ఇంగ్లాండ్ దేశంలో సాంస్కృతిక పునరుజ్జీవనోద్యమ ఫలితంగా ఏర్పడిన శాస్త్రీయ దృక్పథం కేవలం మతసంస్కరణకేకాక నూతన విజ్ఞానశాస్త్ర ఆవిష్కరణలకు కూడా దారితీసింది. 18వ శతాబ్దంలో మొదటగా జేమ్స్‌వాట్ అనే శాస్త్రవేత్త 1765వ సం||లో ఆవిరి యంత్రాన్ని కనుగొనటంతో ఆధునిక వైజ్ఞానిక ఆవిష్కరణలకు పునాది పడింది. మనిషి చేసే పనిని యంత్రం ద్వారా చేయించటంతో వస్తూత్పత్తి సామర్ధ్యం పెరిగింది. ఇది క్రమంగా మొదటగా ఇంగ్లండ్‌లో తదుపరి మిగతా యూరప్‌లో అనతికాలంలోనే అనేక పరిశ్రమలు ఏర్పడటానికి దోహదంచేసింది.

అప్పటివరకు కార్ఖానాలలో తయారయ్యే వస్తువులు పెద్ద పెద్ద పరిశ్రమలలో తయారవటం ప్రారంభమైనది. భారీ పరిశ్రమలకు కావలసిన యంత్రాల తయారీకి ఇనుము, ఉక్కు వంటి లోహాలు మరియు యంత్రాలను నడపటానికి అవసరమైన ఆవిరిశక్తి ఉత్పత్తి కోసం బొగ్గు కావలసి వచ్చాయి. ఫలితంగా ఈ లోహాల ఉత్పత్తి మరియు గనులనుండి బొగ్గు తవ్వితీయడం అధికమైనది. ముడి సరుకులను పరిశ్రమలకు మరియు ఉత్పత్తులను మార్కెట్లకు చేర్చవలసి రావడంతో రవాణారంగం కూడా తీవ్రంగా ప్రభావితమైనది. రైల్వేలు, స్టీమర్లు, ఓడలు నిర్మించబడ్డాయి. ఈ విధంగా ఒక పరిశ్రమ మరికొన్ని పరిశ్రమలు ఏర్పడటానికి మరలా ఆయా పరిశ్రమలన్నీ మరి ఎన్నో పరిశ్రమలు ఏర్పడటానికి కారణమయ్యాయి. ఇదంతా వెరసి ‘పారిశ్రామిక విప్లవం’గా పిలువబడింది.

పారిశ్రామిక విప్లవంలో భాగంగానే అనేక నూతన వైజ్ఞానిక ఆవిష్కరణలు జరిగాయి.వీటివలన ప్రజల జీవితం మరింత సుఖవంతమైనది. ప్రజలకు ఎన్నో సౌకర్యాలు కలిగాయి. ప్రజాజీవితాన్ని సుఖప్రదం చేయటంలో తోడ్పడ్డ ఆవిష్కరణలు విద్యుచ్ఛక్తి, టెలిగ్రాఫ్, టెలిఫోన్, నిస్తంత్రీ వార్తావిధానం, కుట్టుమిషన్, టైపు మిషన్, పెట్రోల్, రబ్బర్, రిఫ్రిజరేటర్ మొదలైనవి. విద్యుచ్ఛక్తి, పెట్రోల్ లను కనుగొన్న తరువాత యంత్రాలను నడపటానికి అవసరమయ్యే ఇంధనంకొరకు బొగ్గు స్థానంలో క్రమంగా ఈ రెంటి వాడకం ప్రారంభమైనది.

ఆనాడు ప్రారంభమైన ఈ నూతన వైజ్ఞానిక ఆవిష్కరణల పర్వం వలస పాలన ఏనాడో అంతమైనా కూడా నేటికీ కొనసాగుతూనే ఉన్నది. మానవ జీవితంలోకి అనేక నూతనమైన వస్తువులు మరియూ పరికరాలూ వచ్చిచేరుతూనే ఉన్నాయి. ఇప్పటి వరకూ కనుగొన్న ప్రతివస్తువు కూడా అది కనుగొనబడిన సమయం దగ్గరనుండి మొదలుకొని నేటి వరకూ కాలానుగుణంగా సున్నితత్వాన్ని మరియు మరింత సామర్ధ్యాన్ని సంతరించుకుంటూనే ఉన్నది.

తెల్లవాడి బాధ్యత

ప్రపంచాన్ని ఆక్రమించుకొనుట కొరకు అప్పటికే ఐరోపాలో అనేక వర్తక సంఘాలు ఏర్పడ్డాయి. స్పానిష్, పోర్చుగీసు, డచ్, బ్రిటిష్, ఫ్రెంచ్ జాతులకు చెందిన ఈ వర్తక సంఘాలు ప్రపంచం అంతా వ్యాపించి ఎవరికి దొరికిన ప్రాంతాన్ని వారు ఆక్రమించుకున్నారు. ఆక్రమణ, పాలన, వర్తకం, దోపిడీ, మతప్రచారం, ఆధునిక నాగరికతా వ్యాప్తి మరియు నూతన వైజ్ఞానిక విద్యా వ్యాప్తి అంతా పక్కపక్కనే జరిగేవి. ఇదంతా ‘ప్రపంచం యెడల తెల్లవాడి బాధ్యత’ గా యూరోపియన్‌లు భావించేవారు.ఇది కొంతవరకు నిజమే. ఐతే దోపిడీ అన్నది మిగిలిన అన్ని విషయాలకన్నా ప్రాధాన్యతను సంతరించుకోవడంతో ఆఖరికి అదే ప్రధాన సమస్యగా పరిణమించింది.

అగ్రరాజ్యంగా బ్రిటన్ ఆవిర్భావం

పారిశ్రామిక విప్లవానికి ముందు స్పెయిన్, పోర్చుగల్ దేశాలు బలమైన నౌకాశక్తిని కలిగి ఉండి అగ్రరాజ్యాలుగా చలామణీ అయ్యేవి. అప్పట్లో దోపిడీ పచ్చిగా, నగ్నంగా జరిగేది. నౌకాబలమే అప్పట్లో దేశాల ఔన్నత్యాన్ని నిర్దేశించేది.

కాలక్రమంలో ఇంగ్లాండులో మొదటగా తదుపరి మిగతా యూరప్‌లో పారిశ్రామిక విప్లవం సంభవించడంతో పారిశ్రామిక శక్తి దేశాల ఔన్నాత్యాన్ని నిర్దేశించటం ప్రారంభమైనది. దీనితో స్పెయిన్ మరియు పోర్చుగల్ దేశాల స్థానంలో ఇంగ్లాండ్ మరియు ఫ్రాన్సు దేశాలు అగ్రరాజ్యాలుగా ఆవిర్భవించాయి. ఈ దేశాల దోపిడీ స్పెయిన్, పోర్చుగల్ దేశాల దోపిడీకి భిన్నంగా ఉంటుంది. ఇవి తాము ఆక్రమించుకున్న దేశాలను తమదేశంలోని పరిశ్రమలకు ముడిసరుకు సరఫరాదారులుగా మరియు తమ దేశపు పరిశ్రమలలో తయారైన వస్తువులకు మార్కెట్లుగా ఉపయోగించుకునేవి. దీనితో ఆయాదేశాలలో అనాదిగా ఉన్న ఆర్థిక జీవనం తలక్రిందులైనది.

ఐరోపా పరిశ్రమలలో తయారైన వస్తువులతో వలస దేశాల మార్కెట్లను ముంచెత్తటంతో ఆయా దేశాలలోని కుటీర పరిశ్రమలన్నీ ఛిన్నాభిన్నమైపోయాయి. ఆ ఉత్పత్తులను కొనే నాథుడే లేడు. దీనివలన ముఖ్యంగా గ్రామీణ జీవనం నాశనమైనది. బ్రతుకుతెరువు కోల్పోయిన గ్రామీణులు పరిశ్రమలలో పనిచేసేటందుకు పట్టణాలకు వలస వచ్చారు.

ఈ వలసలతో పట్టణాలు పెద్ద పెద్ద నగరాలుగా మారాయి. నూతన 'కార్మికవర్గం' సమాజంలో ఆవిర్భవించింది.

గ్రామీణులు పట్టణాలకు వలస రావటం అనే పరిణామం ఐరోపా దేశాలలో కూడా జరిగినది. ఎందుకంటే పారిశ్రామిక విప్లవం ఫలితంగా ఐరోపా పట్టణాలలో స్థాపించబడిన పరిశ్రమల మూలంగా ఆ దేశాలలోని గ్రామాలలో గల కుటీర పరిశ్రమలు కూడా దెబ్బతిన్నాయి.

మధ్యతరగతి ఆవిర్భావం-విప్లవ సన్నాహం

కార్మిక వర్గంతోపాటు మరో వర్గంకూడా సమాజంలో ఏర్పడింది. అదే 'మధ్య తరగతి వర్గం'. కార్మిక వర్గం పారిశ్రామిక విప్లవం తదనంతరం తలయెత్తితే మధ్యతరగతి వర్గం మాత్రం అంతకన్నా ముందే వలసల స్థాపనతోటే సమాజంలో జనించి పారిశ్రామిక విప్లవంతో మరింతగా పెరిగి బలపడింది.

అప్పటి వరకు ప్రజలు రెండే వర్గాలుగా ఉండే వారు. ధనిక ప్రభువర్గం మరియు పేద ప్రజలు. ఫ్రజలంతా దాదాపూ పేదలే(వ్యాపార వర్గం ఉపేక్షించదగిన స్వల్ప పరిమాణంలో మాత్రమే ఉండేది. వారికెటువంటి ప్రాబల్యం ఉండేది కాదు). ప్రభువర్గం మాత్రమే ఉన్నత ప్రమాణాలతో కూడిన జీవితం అనుభవించేది. కానీ వలసల స్థాపనతో మరియు ఆ తరువాత పారిశ్రామిక విప్లవంతో వ్యాపార, వాణిజ్యాలు పెరగటంతో ప్రభువర్గం, పేదప్రజలకు మధ్యన వ్యాపారం మరియు పరిశ్రమలద్వారా ధనం ఆర్జించిన మరో వర్గం సమాజంలో ఏర్పడింది. అదే మధ్య తరగతి వర్గం లేక బూర్జువా వర్గం. ఈ మధ్య తరగతి వర్గం కాలక్రమంలో విశ్వరూపం దాల్చింది. అనేక స్థాయీ భేదాలతో ఈ వర్గపు ప్రజలు పెంపొందారు. దీనికి తోడు ఆధునిక వైద్య సౌకర్యాలతో ప్రజల ఆయుఃప్రమాణం పెరిగి విస్పోటనం సంభవించినట్లుగా జనాభా పెరిగింది.

ఈ మధ్య తరగతి ఏర్పడినప్పటినుండి మానవుడు అదృష్టవంతుడయ్యాడు. ప్రభువర్గంలో జన్మించని పక్షంలో పేదవాడిగా అణగారి జీవించాల్చిన పరిస్థితి దీనితో అంతరించింది. సాధారణమైన పౌరుడు జీవితంలో ఏ కొద్ది వృద్ధి అయినా సాధించగలిగే అవకాశాలు సమాజంలో ఏర్పడ్డాయి. అలా అభివృద్ధి సాధించిన వారే మధ్యతరగతివారు. వీరు అటు ఫ్యూడల్ ప్రభువులు కారు.ఇటు నిరుపేదలు కారు. అందుకే వీరిని మధ్య తరగతి అన్నారు. వీరిలో కోటీశ్వరులూ ఉన్నారు; చిన్న చిన్న వ్యాపారస్థులు మరియు వివిధ స్థాయి ఉద్యోగులూ ఉన్నారు. ఐతే వీరిలో ధనిక బూర్జువా వర్గం మత్రమే విప్లవాత్మకం అయిన క్రియాశీలతను కలిగిఉన్నది.

మొదట ఈ విప్లవ బూర్జువావర్గానికి చెందినవారు ఫ్యూడల్ ప్రభువుల కనుసన్నలలో మెలగుతూ వారికి విధేయులై వారి ఆజ్ఞలకు, శాసనాలకు లోబడి పెంపొందారు. వీరు ఎంతగా వృద్ధి చెందారంటే వీరి భావి వికాసం ఇక ఫ్యూడల్ వ్యవస్థ పరిధిలో ఎంత మాత్రం జరగదు. ఫ్యూడల్ వ్యవస్థ వీరికి ఆటంకంగా పరిణమించింది. దీనితో ఈ బూర్జువా వర్గం తమకనుగుణమైన రాజకీయ వ్యవస్థను నిర్మించుకోవటానికి ప్రయత్నాలు ప్రారంభించింది.

ఈ మొత్తం వ్యవహారంలో ఒక విషయం దానంతటదే జరిగిపోయింది. ప్రపంచ మానవాళి జీవనంలో ఇస్లాం తన ప్రాభవాన్ని కోల్పోయింది. ప్రపంచ రాజకీయ కేంద్రం ఇస్లామిక్ ఆసియా నుండి పెట్టుబడిదారీ ఐరోపాకు మారింది.

ఈ మధ్యతరగతి వర్గం వ్యవస్థలోని మూడు అంగాలలో ‘సమాజం’ అనే అంగానికి ప్రాతినిథ్యం వహించింది. సమాజ వికాసం వీరివలనే సాధ్య పడింది. వీరు మితిమీరిన రాజ్య శక్తినుండి మానవాళిని కాపాడారు. ప్రమాదంలో పడిన సమాజాన్ని రక్షించారు. వ్యవస్థలోని సమాజం అనే అంగం యొక్క ప్రయోజనాలను వీరు కాపాడారు. వీరి వలన సమాజం బహుముఖాలుగా విస్తరిల్లింది. దానిలోని ఉత్పత్తి వనరులు మరియు మౌలిక సదుపాయాలు వృద్ధిచెందాయి.ఖండాంతర వ్యాపారం వృద్ధి చెందింది.నిరంతర యుద్ధాల బారినుండి ప్రజలను వీరు రక్షించారు.సమాజంలో శాంతియుత పరిస్థితులు నెలకొన్నాయి. ప్రజలలో మూఢ విశ్వాసాల స్థానంలో శాస్త్రీయ దృక్పథం నెలకొన్నది. తద్వారా విజ్ఞాన శాస్త్రావిష్కరణ జరిగినది. ఆ విజ్ఞాన శాస్త్ర ఫలాలను, అది అందించే సౌకర్యాలను మానవాళి అందుకున్నది. సమాజంలో అభ్యుదయకారకమైన నూతన నాగరికత, నూతన జీవన విధానం వెల్లివిరిసాయి.

ఇంతకు ముందే చెప్పినట్లుగా మొదట ఈ మధ్యతరగతి వర్గం నిరంకుశ ఫ్యూడల్ ప్రభువుల శాసనాలకు లోబడే వృద్ధిచెందింది. కాలక్రమంలో రాజ్యపు చట్రంనుండి తాము బయటపడి ప్రజలను కూడా రక్షించాలని వీరు కాంక్షించారు. ఈ క్రమంలో ఫ్రాన్సు దేశంలో సంభవించిన విప్లవం ప్రపంచంలో సమాజం యొక్క ప్రయోజనాలను కాపాడే వ్యవస్థ అయిన పెట్టుబడిదారీ వ్యవస్థకు మరియు దాని రాజకీయ రూపమైన పార్లమెంటరీ ప్రజాస్వామ్యంనకు ప్రాతిపదికగా నిలచింది.అదే ‘ఫ్రెంచ్ విప్లవం’ గా చరిత్రలో పిలువబడింది.

ఈ విధంగా ఏర్పడిన పెట్టుబడిదారీ వ్యవస్థ మానవాళి జీవన విధానాన్ని,వారి జీవన దృక్పథాన్ని సంపూర్ణంగా మార్చివేసింది. ఐతే కాలక్రమంలో ఈ వ్యవస్థకు దీని యొక్క దోపిడీ స్వభావంవలన సామ్యవాదరూపంలో ఎంతో వ్యతిరేకత ఏర్పడినది. ఆ పరిణామాలను ఇప్పుడు చూద్దాం.....(సశేషం)

హోమ్‌పేజి

భారతదేశానికి ఎటువంటి వ్యవస్థ కావాలి..?!---8

హోమ్‌పేజి

పెట్టుబడిదారీ వ్యవస్థ ఆవిర్భావం

వలసల స్థాపన

సాంస్కృతిక పునరుజ్జీవనోద్యమ ఫలితంగా ఐరోపా జాతిలో ఏర్పడిన నూతన భావజాలం, అభ్యుదయ మరియు ఆధునిక జీవన విధానం, శాస్త్రీయమైన ఆలోచనావిధానం మొదలైన వాటిని ప్రపంచ ప్రజలందరికీ అందించే ఉద్దేశంతో ఐరోపా జాతులు ప్రపంచాన్ని పాలించడానికి ఆయత్తమయ్యాయి. వీరి ఉద్దేశం మంచిదే.కానీ ఈ లక్ష్య సాధనకు వీరు ఎంచుకున్న మార్గం మాత్రం దోపిడీకి మరియు మోసానికి దారితీసింది.

ఇప్పటివరకు చరిత్రకారుల భావన ప్రకారం వలసల స్థాపనలోని ముఖ్యోద్దేశం ‘మర్కెంటైలిజం’. అంటే వలసలను దోపిడీ చేసి స్వదేశ సంపదను పెంచడం. వలసలలో ఆధునిక నాగరికతా వృద్ధి అనేది ఒక పర్యవసానం మాత్రమే. కానీ ఏది ముఖ్యోద్దేశం ఏది పర్యవసానం అనేది మనం చరిత్రను చూచే దృక్కోణాన్ని బట్టి ఉంటుంది. చరిత్రలోని వాస్తవ సంఘటనలకు ఎవరి అభిప్రాయానికి అనుగుణంగా వారు నిర్ధారణలు చేస్తారు. పెట్టుబడిదారీ వ్యవస్థ సమర్ధకులు ఒక రకంగా చేసిన నిర్ధారణలను సామ్యవాద దృక్పథం కలిగినవారు మరోరకంగా చేస్తారు.

(ఆయా వ్యవస్థల సాఫల్యత ఎలా ఉన్నా మౌలిక ఉద్దేశానికి సంబంధించి నంతవరకూ కమ్యూనిజం మాత్రమే ప్రజాప్రయోజనం యెడల చిత్తశుద్ధితో ఉన్నట్లుగా కనపడుతుంది. కాపిటలిజం ఉద్దేశం మాత్రం దోపిడీ అన్నట్లుగా ఉంటుంది. ఇక ఇస్లాం విషయంలో ఆ మాత్రం స్పష్టత కూడా ఉండదు. అది అసలు రాజకీయ వ్యవస్థలానే అనిపించదు.ఓ మతంలా గోచరిస్తుంది. ఆయా వ్యవస్థల మౌలిక తత్త్వాలలో ఉన్న భేదం వలననే ఈవిధంగా జరుగుతుంది. అవి ఎలా ఉన్నా, బాహ్య దృష్టికి అవి ఎలా గోచరించినా అసలు వాస్తవమేమిటనేది మనం విజ్ఞతతోనే గ్రహించాలి)

చారిత్రక ఘటనామాలికలోని అంతస్సూత్రాన్ని ఇంతవరకూ ఎవరూ వివరించలేకపోయారు. చరిత్రలోని సంఘటనాక్రమాన్ని వెనుకనుండి నడిపిస్తున్న తత్త్వాన్ని ఇంతవరకూ ఎవరూ తెలుసుకోలేకపోయారు. దానిని కొంతవరకు కార్ల్ మార్క్స్ వివరించటానికి ప్రయత్నించాడు. కానీ సఫలీకృతం కాలేకపోయాడు. కనుక మనం ఇప్పటి వరకూ ఉన్న నిర్ధారణల యెడల మరీ అంతగా నిబద్ధులం అవ్వవలసిన అవసరమేమీలేదు.స్వేచ్ఛగా మన అభిప్రాయాలను మనం ఏర్పరచుకోవచ్చు.

చరిత్రలో మునుపెన్నడూ సాధ్యంకానంతటి విస్తారమైన భూభాగంతో, యశోవంతమైన వలస సామ్రాజ్యం కేవలం స్వార్ధ, సంకుచిత, దుర్బల, అనైతికమైన దోపిడీని పునాదిగా కలిగి అన్నినాళ్ళు మనగలిగినదనడం అసంబద్ధం. ఈ వలస సామ్రాజ్య స్థాపనలో అంతర్లీనంగా ఉన్న ఉద్దేశం ఐరోపాలో సాంస్కృతిక పునరుజ్జీవన ఫలితంగా తలెత్తిన నూతన నాగరికతను, నూతన జీవన విధానాన్ని ప్రపంచ ప్రజలందరకూ అందజేయటం మాత్రమే. ఐతే దోపిడీ అనేది వలస పాలన యొక్క అనివార్య పర్యవసానం. ఇస్లాం తన సిద్ధాంత వ్యాప్తికి దురాక్రమణను మార్గంగా గైకొంటే ఐరోపా జాతులు వలస విధానాన్ని మార్గంగా గైకొన్నాయి.

ఇస్లాం కానీయండి, కాపిటలిజం కానీయండి, కమ్యూనిజం కానీయండి; మౌలికంగా వీటి ఉద్దేశం `ప్రజాప్రయోజనమే. కానీ వాటి యొక్క కొన్ని అనివార్య లక్షణాలు, పర్యవసానాలవలన అవి ప్రజలకు పీడగా పరిణమించాయి.

ఏదైనా ఒక నూతన తాత్త్విక నేపథ్యంతో లేక మరేదైనా నూతన దృక్కోణంలో చరిత్ర క్రమాన్ని పరిశీలించేటపుడు ఆ దృక్పథానికి అనుగుణంగా చారిత్రక సంఘటనలకు నూతనమైన నిర్ధారణలు చేయటం సాధారణమైన విషయం. ఒక్కొక సారి మౌలిక అంశాలలో కూడా అప్పటికి వ్యాప్తిలో ఉన్న నిర్ధారణలతో విభేదించవలసి వస్తుంది. కార్ల్ మార్క్స్ సామ్యవాద దృక్పథంతో, గతితార్కిక తాత్త్విక నేపథ్యంతో ప్రపంచ చరిత్రను ఎంత వినూత్నంగా వివరించాడో మనకు తెలిసిన విషయమే. ఈ రచన కూడా ప్రపంచ చరిత్రను భారతీయ తత్త్వశాస్త్రానుగుణమైన (రెండవ అధ్యాయంలో వివరిస్తాను) ఒక విభిన్న దృక్కోణంలో పరిశీలించటానికి ప్రయత్నిస్తున్న కారణంగా ఈ రచనలో చరిత్ర గురించి కొన్ని నూతనమైన నిర్ధారణలు జరిగాయి. ఇస్లాం క్రైస్తవం, బౌద్ధంల తోపాటు పేర్కొనదగిన ఒక మతంగా కాక కాపిటలిజం, కమ్యూనిజంల సరసన పేర్కొనదగిన ఒక సామాజిక, రాజకీయ వ్యవస్థగా నిర్ధారింపబడినది. అలాగే పెట్టుబడిదారీ వ్యవస్థ యొక్క మౌలిక ఉద్దేశం దోపిడీ కాదు, ప్రపంచ దేశాలకు ఆధునిక, అభ్యుదయ నాగరికతనందించటమేననీ; దోపిడీ ఈ వ్యవస్థ యొక్క అనివార్య పర్యవసానం మాత్రమేననే నిర్ధారణ కూడా ఇటువంటిదే.

కొత్తగా కనుగొనబడిన జలమార్గాలు మరియు ‘నూతన ప్రపంచం’ వలన ఐరోపా జాతులు ప్రపంచమంతటా వలసల స్థాపనకు పూనుకున్నాయి. ఈ నూతన భౌగోళిక ఆవిష్కరణలలో ప్రధాన పాత్ర పోషించిన స్పెయిన్ మరియు పోర్చుగల్ దేశాలు వలసల స్థాపనలో ముందు నిలిచాయి. బ్రెజిల్ మినహా మిగతా ఉత్తర, దక్షిణ అమెరికా ఖండాలను స్పెయిన్‌కు, బ్రెజిల్ మరియు ఆసియా, ఆఫ్రికా ఖండాలను పోర్చుగల్‌కు దఖలు పరుస్తూ 15వ శతాబ్దపు చివరికాలంలో పోప్ ఒక నిర్ణయం చేసాడు.

దక్షిణ అమెరికా ఖండాన్ని స్పెయిన్ ఆక్రమించి అక్కడికి స్పానిష్ ప్రజలు వలస వెళ్ళటంతో ఇప్పటి లాటిన్ అమెరికా జాతులు ఏర్పడ్డాయి. అప్పటి వరకు ఆ ప్రాంతాలలో విలసిల్లిన ‘మాయా’, ‘అజ్‌టెక్’ తదితర నాగరికతలు స్పానియార్డులచే సమూలంగా నాశనం చేయబడ్డాయి. అక్కడ అనాదిగా నివసిస్తున్న మంగోల్ జాతికి చెందిన ‘రెడ్ ఇండియన్‌లు’ పెద్దయెత్తున ‘జీనోసైడ్’ (ఒక జాతికి చెందిన ప్రజలను పెద్దయెత్తున చంపటం) కు గురయ్యారు. మిగిలిన కొద్దిమంది అడవుల్లోకి తరిమివేయబడ్డారు.

తదనంతర కాలంలో ‘కెప్టెన్ కుక్’ అను బ్రిటిష్ నావికుని వలన కనుగొనబడి, బ్రిటిష్ జాతి ఆక్రమణకు గురైన ఆస్ట్రేలియా, న్యూజీలాండ్‌లో కూడా ఇదే విధమైన మారణహోమం జరిగినది. అప్పటి వరకు అక్కడ నివసించిన నీగ్రోజాతికి చెందిన స్థానిక ప్రజలు చాలావరకు జీనోసైడ్‌కు లోనై, మిగిలిన కొద్ది మంది అడవుల్లోకి తరిమివేయబడ్డారు.

అమేయమైన నౌకాశక్తి కలిగిన స్పెయిన్ దేశం నూతన భౌగోళిక ఆవిష్కరణలలో ప్రధాన పాత్ర పోషించింది. దక్షిణ అమెరికా ఖండాన్ని ఆక్రమించి అగ్రరాజ్యంగా ఆవిర్భవించింది. ప్రపంచంలో దోపిడీ ప్రారంభమయ్యింది. స్పెయిన్ హయాంలో దోపిడీ ప్రత్యక్షంగా జరిగేది. అక్కడున్న సంపదలను ప్రత్యక్షంగా దోపిడీ చేసి స్వదేశానికి నౌకల ద్వారా తరలించేవారు. ఈ క్రమం దాదాపు ఒకటిన్నర శతాబ్దంపాటు కొనసాగింది.అప్పట్లో పోర్చుగల్ కూడా గొప్ప రాజ్యంగా ఉండి వలసలను స్థాపించింది. హాలెండ్ (డచ్చి వారు) కూడా ఈ సమయంలో వలసలను స్థాపించనారంభించిన మరోదేశం.

ఈ సమయంలోనే పోర్చుగీసు వారు భారతదేశంలోని గోవాలో మరియు కొన్ని తూర్పు ఆసియా దేశాలలో కూడా వర్తక స్థావరాలను ఏర్పరచుకున్నారు. వీరితో పాటే క్రైస్తవ మిషనరీలు కూడా ఆయాదేశాలకు వచ్చి తమ మత ప్రచార కార్యక్రమాన్ని కొనసాగించాయి. కానీ కాలక్రమంలో ఇంగ్లాండ్‌దేశాంతో క్రీ||శ.1588వ సం||లో జరిగిన యుద్ధంలో ‘స్పానిష్ అర్మడా’ పేరుతో ఖ్యాతివహించిన స్పెయిన్ దేశపు నౌకాదళం ఓడిపోవటంతో వలస రాజ్య స్థాపనలో స్పెయిన్ ప్రాబల్యం క్రమంగా అంతరించింది. అప్పటినుండి ఇంగ్లాండ్ ప్రాభవం ప్రారంభమైనది. ఫ్రాన్స్ కూడా బ్రిటన్‌తో పోటీ పడింది.

కెనడా ప్రాంతంలో కొన్ని ఫ్రెంచ్ వలసలు స్థాపించబడ్డాయి. 17వ శతాబ్దంలో మతకారణాల వలన దేశ బహిష్కరణకు గురైన అనేక మంది ఇంగ్లాండ్ దేశీయులు అమెరికా తూర్పు తీరంలో అనేక వలసలను ఏర్పరచుకున్నారు. వీరంతా తామరతంపరగా వృద్ధిచెంది ఉత్తర అమెరికా ఖండపు దేశాలైన అమెరికా మరియు కెనడాలు ఆవిర్భవించాయి......(సశేషం)

హోమ్‌పేజి

భారతదేశానికి ఎటువంటి వ్యవస్థ కావాలి..?!---7

హోమ్‌పేజి

ఐరోపాలో సామాజిక వికాసం

15వ శతాబ్దంలో జరిగిన ఒక కీలక సంఘటన చీకటి యుగంలో మగ్గుతున్న ఐరోపాలో సామాజిక వికాసానికి దారితీసినది. ఈ సామాజిక వికాసానికి చాలా ప్రాముఖ్యత ఉన్నది. ఈ వికాసం తదనంతర ప్రపంచ చరిత్రగతిని నిర్దేశించినదిగా, పెట్టుబడిదారీ వ్యవస్థకు నేపథ్యంగా చెప్పుకోవచ్చు.

ఆ కీలక సంఘటన ఏమిటంటే ఆటోమన్ టర్కులు తమపొరుగున ఉన్న బైజాంటైన్ సామ్రాజ్యం మీద దాడి చేసి దాని రాజధాని అయిన కాన్‌స్టాంటినోపుల్ (నేటి ఇస్తాంబుల్) ను ఆక్రమించి సుధీర్ఘకాలం నుండి వెలుగొందుతున్న ఆ సామ్రాజ్యాన్ని పతనం చేసారు. ఆటోమన్ సామ్రాజ్యం ఇస్లామిక్ సామ్రాజ్యం. ఇది నేటి టర్కీ ప్రాంతంలో ఉండేది. బైజాంటైన్ సామ్రాజ్యం క్రైస్తవ సామ్రాజ్యం. ఒకప్పటి రోమన్ సామ్రాజ్యంలో అంతర్భాగంగా ఉండి తదుపరి దానినుండి విడివడి తూర్పు యూరప్‌లో విలసిల్లిన గొప్ప సామ్రాజ్యం.

(క్రీస్తు పూర్వం నేటి ఇటలీ దేశపు రాజధాని ఐన రోము నగరం రాజధానిగా సువిశాలమైన భూభాగంలో విస్తరించి విలసిల్లినది రోమన్ సామ్రాజ్యం. కాలాంతరంలో దానియొక్క తూర్పు ప్రాంతం విడిపోయి బైజాంటైన్ సామ్రాజ్యంగా ఏర్పడింది. గ్రీసు దేశం, రష్యా మొదలైనదేశాలు కలిగిన నేటి తూర్పు యూరప్ ప్రాంతంలో ఈ బైజాంటైన్ సామ్రాజ్యం కొనసాగింది. రోము నగరం రాజధానిగా గల పశ్చిమ ఐరోపా లోని రోమన్ సామ్రాజ్యం అనాగరిక, బర్బర, అరాచక జాతులవలన ఏర్పడిన కల్లోలంలో పతనమైనది. దీనివలన అప్పటి వరకు రోమన్ సామ్రాజ్యం వలన గొప్ప నాగరికతా సంస్కృతులతో ఉజ్వల వైభవాన్ని చవిచూచిన పశ్చిమ ఐరోపాలో అన్ని రంగాలలోనూ స్థబ్దత ఆవహించినది. ఈ స్థబ్దత ఒక వేయి సంవత్సరాలు (క్రీ||శ.410 నుండి క్రీ||శ.1410 వరకు) కొనసాగింది. ఈ కాలాన్ని ఐరోపా చరిత్రలో చీకటి యుగంగా చరిత్రకారులు పిలిచారు. బైజాంటైన్ సామ్రాజ్యం మాత్రం అవిచ్ఛిన్నంగా కొనసాగింది.

సరిగా ఈ సమయంలోనే పశ్చిమ ఆసియా ప్రాంతంలో 7వ శతాబ్దంలో ఇస్లాం ఆవిర్భవించి ప్రపంచ రాజకీయాలలో తిరుగులేకుండా ఆధిపత్యాన్ని చాటి అంతా తానై అజేయంగా నిలిచింది. సుదీర్ఘకాలం కొనసాగిన ఇస్లామిక్ ప్రస్థానంలో నేటి టర్కీ ప్రాంతంలో (ఆసియా మైనర్) నెలకొని సువిశాలంగా విస్తరిల్లిన ఆట్టోమన్ టర్కీ సామ్రాజ్యం క్రీ||శ.1453వ సంవత్సరంలో తమ పొరుగున ఉన్న బైజాంటైన్ సామ్రాజ్యం మీద దాడిచేసి దాని రాజును హతమార్చి ఆ సామ్రాజ్యాన్ని పతనం చేసింది.)

ఆటోమన్ టర్కులు బైజాంటైన్ సామ్రాజ్యం మీద దాడి చేసి దాని రాజధాని ఐన కాన్‌స్టాంటినోపుల్‌ను ఆక్రమించుకోవటం యావత్ మానవజాతి నాగరిక ప్రస్థానంలోనే, యావత్ మానవజాతి రాజకీయ చరిత్రలోనే అత్యంత ప్రధానమైన సంఘటనలలో ఒకటి. దీనివలన భవిష్యప్రపంచాన్ని, మానవాళి జీవనశైలినీ నిర్దేశించే ప్రధానమైన కొన్ని పరిణామాలు 15వ మరియు 16వ శతాబ్దాలలో ఐరోపాలో సంభవించాయి.

అవి:

1. నూతన భౌగోళిక ఆవిష్కరణలు.

2. సాంస్కృతిక పునరుజ్జీవనం.

3. క్రైస్తవ మత సంస్కరణోద్యమం.

సామాజిక వికాసాన్ని జాతిగత స్వభావంగా కలిగిన ఐరోపా జాతులకు తమ స్వభావాన్ని వ్యక్తీకరించుకొనుటకు మరియు తదనుగుణమైన పెట్టుబడిదారీ వ్యవస్థను పెంపొందించుట కొరకు ఈ పరిణామాలద్వారా కాలం కలసి వచ్చింది.


నూతన భౌగోళిక ఆవిష్కరణలు

అనాదినుండి ఐరోపా మరియు తూర్పు ఆసియా దేశాల మధ్యన వర్తకం మధ్యధరా సముద్రం ద్వారా జరిగేది. ఆ ప్రాంతం మొదట క్రైస్తవ బైజాంటైన్ సామ్రాజ్యం యొక్క ఆధీనంలో ఉండటం వలన యూరప్ దేశాల వర్తకం నిరాటంకంగా జరిగేది.కానీ అది ఇస్లామిక్ ఆటోమన్ టర్కుల ఆక్రమణలోకి వచ్చేసరికి యూరప్ వర్తకానికి ఆటంకమేర్పడింది. ఈ వర్తకం ఐరోపా దేశాల ఆర్థిక వ్యవస్థకు కీలకమైనది. దానితో వారు తూర్పు ఆసియా దేశాలకు నూతన మార్గాలను అన్వేషించటానికి పూనుకున్నారు. ఈ అన్వేషణను ప్రధానంగా స్పానిష్, పోర్చుగీసు పాలకుల ధనసహాయంతో మరియు ప్రోద్బలంతో సాహసవంతులైన ఇటాలియన్ నావికులు నిర్వహించారు. ఈ క్రమంలో ఆఫ్రికా ఖండం క్రిందివైపుగా 1498వ సం||లో ప్రధానంగా భారతదేశానికి తద్వారా తూర్పు ఆసియా దేశాలకు నూతన మార్గాన్వేషణా ప్రయత్నం ఫలించింది. ఈ ప్రయత్నంలోనే యాదృచ్ఛికంగా అమెరికా ఖండం కనుగొనబడింది. అలాగే సహారా ఎడారికి దక్షిణాన ఉన్న ఆఫ్రికా ఖండపు ప్రాంతంతో కూడా మిగతా ప్రపంచానికి సంబంధాలు ఏర్పడ్డాయి. ఈ విధంగా కనుగొనబడిన అమెరికా ఖండం తదితర ప్రాంతాలను ‘నూతన ప్రపంచం’ గా చరిత్రకారులు పిలిచారు.

సాంస్కృతిక పునరుజ్జీవనం(The Renaissance)

బైజాంటైన్ సామ్రాజ్యం ఆటోమన్ టర్కుల ఆధీనంలోకి రావటంతో టర్కుల దురంతాలకు భయపడి గ్రీకు పండితులు, కవులు, కళాకారులు ఇటాలియన్ నగరాలకు వలస వెళ్ళిపోయారు. బైజాంటైన్ సామ్రాజ్యం ఇటలీ కేంద్రంగా వర్ధిల్లిన ఒకనాటి రోమన్ సామ్రాజ్యానికి దాయాది రాజ్యం అవడంవలన అది గ్రీకోరోమన్ సంస్కృతికి ఆటపట్టుగా నిలచినది. అందువలన ఈ కాందిశీకులను ఆ సంస్కృతి యెడల ఆదరణ గలిగిన ఇటలీలోని సంపన్న వర్తకులు ఆదరించి, ఆశ్రయమిచ్చారు. వీరి ప్రభావం వలన ప్రాచీన గ్రీకురోమన్ సంస్కృతి పునరధ్యయనానికి ప్రేరణ కలిగినది. దానితో ఒకనాడు సముజ్వలంగా వెలుగొందిన కళలు, సాహిత్యం, వాస్తుశిల్పం, సంస్కృతి తిరిగి జవజీవాలు సంతరించుకోవడంతో సాంస్కృతిక పునరుజ్జీవనం సంభవించి, అది క్రమంగా ఇటలీ నుండి ఐరోపా అంతటా వ్యాపించింది. ఇదే సమయంలో 1450వ సం||లో అచ్చు యంత్రం కనుగొనబడటంతో అగ్నికి ఆజ్యం తోడైనట్లుగా పునరుజ్జీవన ఉద్యమం ప్రజలలో వ్యాపించినది. దేశభాషలలో సారస్వత వికాసం జరగటంతో జనబాహుళ్యంలోకి నూతనభావజాలం విస్తృతంగా వ్యాపించింది.

పునరుజ్జీవన ఉద్యమంతో యూరోపియన్ సమాజంలో బహుముఖ ప్రగతి సంభవించి అది ఆధునిక నాగరికతకు పునాది వేసింది. ఈ ఉద్యమం యూరోపియన్ మేధావులలో సృజనాత్మకమైన, నూతనమైన, స్వీయ ఆలోచనలను కలిగించింది. చీకటి యుగపు బంధిఖానా నుండి ఐరోపా ప్రజ విముక్తిపొందింది. ఆ యుగంనాటి అన్నిరకాల మూఢత్వాలను ప్రజలు తిరస్కరించారు.

చీకటి యుగం మూలంగా తెగిపోయిన తమ సాంస్కృతీ వికాస స్రోతస్సును ఐరోపా ప్రజలు తిరిగి ముడివేసి నేటి ఆధునిక, అభ్యుదయ జీవన విధానం మరియు శాస్త్రీయ దృక్పథములవైపు కొనసాగించారు.

క్రైస్తవ మత సంస్కరణోద్యమం(Reformation)

ప్రజల ఆలోచనాధోరణిలో వచ్చిన ఈ మార్పు యూరప్‌లో సామాజిక వికాసానికి, జనజీవన చైతన్యానికి ఆటంకంగా ఉన్న మతంలో మార్పుకు దారితీసింది. సాంస్కృతిక పునరుజ్జీవన ఉద్యమ ప్రభావంతో జర్మనీలో మార్టిన్ లూథర్ చర్చి దురాచారాలను ఖండిస్తూ 1517వ సం||లో కరపత్రం విడుదల చేయటంతో చెలరేగిన కలకలం క్రైస్తవ మతసంస్కరణోద్యమానికి దారితీసింది. తిరిగి ఈ ఉద్యమం కూడా ఐరోపా అంతటా వ్యాపించింది. క్రైస్తవ మతాన్ని తమ జీవన వికాసానికి అనుగుణంగా ప్రజలు తీర్చిదిద్దుకున్నారు. చర్చి రెండుగా చీలి క్రైస్తవులు రోమన్ కాథెలిక్కులు (పూర్వాచార) మరియు ప్రొటెస్టెంట్‌లు (సంస్కరణవాద) గా విడిపోయారు.

ప్రొటెస్టెంట్ ఉద్యమ ఫలితంగా కాథలిక్కులు కూడా ఇగ్నేషియా లయోలా నాయకత్వంలో తమలోని లోటుపాట్లను సరిదిద్దుకోవటంతో (ప్రతిసంస్కరణోద్యమం) క్రైస్తవ మతసంస్కరణ సంపూర్ణమైనది.

టర్కులు బైజాంటైన్ సామ్రాజ్యాన్ని ఆక్రమించడం వలన పై విధంగా ఐరోపాలో సంభవించిన సామాజిక వికాసం తిరిగి వలసల స్థాపన, పారిశ్రామిక విప్లవం, నూతన వైజ్ఞానిక ఆవిష్కరణలు లాంటి తదనంతర పరిణామాల రూపంలో విశ్వవ్యాప్తమైన పెట్టుబడిదారీ వ్యవస్థకు దారితీసింది. ఆ పరిణామాల గురించి ఇప్పుడు చర్చిద్దాం.......(సశేషం)

హోమ్‌పేజి

భారతదేశానికి ఎటువంటి వ్యవస్థ కావాలి..?!---6

హోమ్‌పేజి

జాతిగత స్వభావం

ఇక్కడ ఒక ముఖ్యవిషయం చెప్పుకోవాలి. ఆదేమంటే కాపిటలిష్టు విప్లవాలు రాజ్యశక్తికి వ్యతిరేకంగా జరిగాయి. రాజ్యశక్తికి ఇస్లాం కేంద్రబిందువు. దానిని ఇస్లాం పెంపొందించింది. కానీ పెట్టుబడిదారీ విప్లవాలేవీకూడా రాజరికానికి వ్యతిరేకంగా జరిగినా కూడా అవి ఇస్లామిక్ దేశాలలో జరగలేదు. ఇక్కడ మనం ఒక ప్రధాన విషయం గుర్తించాలి. ఇస్లాంకానీ, కాపిటలిజం కానీ,తదనంతరం తలయెత్తిన కమ్యూనిజం కానీ మానవాళినంతటినీ ఉద్దేశించినవి. ఐతే ఇవి ఆయాజాతుల జాతిగత స్వభావాన్ననుసరించి ఒక్కొక వ్యవస్థను ఒక్కొక జాతి ఏర్పరచి మిగతా ప్రపంచమంతా వ్యాప్తినొందటానికి ప్రయత్నించాయి.ఇక్కడ మానవుడు సామాన్య విషయం (Common Factor). ఎక్కడైనా మానవుడే ఈ సమస్యలను ఎదుర్కొని పరిష్కారానికి పూనుకున్నాడు.

ఇస్లాం ఆవిర్భావానికి ముందు ఆటవిక బర్బరజాతుల అరాచకానికి గురయ్యింది ప్రధానంగా యూరప్. (ఆనాటి ప్రపంచమంతా ఇవి ఆగడాలు చేసినా సర్వ విధ్వంసం సృష్టించినది మాత్రం యూరప్‌లోనే)ఐతే దీనికి విరుగుడుగా ఇస్లాం ఆవిర్భవించింది అరేబియాలో. అలాగే రాజ్యశక్తి మితిమీరిన భూస్వామ్యవ్యవస్థ వ్యవస్థీకృతమైనది, సిద్ధాంతీకరింపబడినది ఇస్లామిక్ దేశాలలో. కానీ ఈ మితిమీరిన రాజ్యశక్తికి వ్యతిరేకంగా విప్లవాలు చెలరేగి కాపిటలిజం ఏర్పడినది ఐరోపాలో. అలాగే కాపిటలిజం మితిమీరి పచ్చిదోపిడీదారీగా మారినది పారిశ్రామికంగా అభివృద్ధి చెందిన పశ్చిమ ఐరోపాలో మరియు దాని వలసలలో. ఐతే దీనికి వ్యతిరేకంగా కమ్యూనిష్టు విప్లవం వచ్చింది రష్యాలో;తదనంతరం చైనాలో. ఇవి రెండూ అప్పటీకి రైతు రాజ్యాలే.ఫ్యూడల్ వ్యవస్థలోనే ఉన్నాయి.

అంటే యావత్ మానవాళినంతటినీ ఉద్దేశించిన ఈ పరిష్కారాలు సమస్య తీవ్రంగా ఉన్న చోటకాక మరోచోట కనుగొనబడ్డాయి. వైవిధ్యమైన జాతులున్న విశాల ప్రపంచంలో ఆయాజాతుల జాతిగత స్వభావాన్ననుసరించి కొన్ని జాతులు సమస్యగా పరిణమిస్తే మరికొన్ని జాతులు పరిష్కారాలు కనుగొన్నాయి.అలా కనుగొనడంలో అవి తమతమ దేశాలలోని వ్యవస్థలమీదే పోరాడాయి.

బర్బరజాతులు ఐరోపాను ఛిన్నాభిన్నం చేస్తున్న సమయంలో పటిష్ఠమైన రాజ్యవ్యవస్థను ఏర్పరచి అరాచకాన్ని అణచవలసిన ఆవశ్యకత ఏర్పడింది. ఐతే శక్తివంతమైన రాజ్యవ్యవస్థను ప్రపంచంలోనే మేటిగా ఏర్పరచగలిగే విధంగా జాతిగత స్వభావాన్ని కలిగి ఉన్న అరేబియా ప్రాంతంలో ఇస్లాం ఆవిర్భవించింది. ఆ స్వభావాన్ని కలిగిన ఇతర జాతులలో కూడా అది వ్యాపించింది. తిరిగి రాజ్యమే ఒక సమస్యగా పరిణమించినపుడు సమాజ ప్రయోజనాలు ప్రమాదంలో పడినపుడు రాజ్య శక్తిని నిర్వీర్యం చేసే ఆలోచనా విధానం ఏ జాతైతే రాజ్యశక్తిని నిర్మించటం జాతిగత స్వభావంగా కలిగిఉందో అదే జాతిలో ఎలా జనించగలదు?

కనుకనే సమాజ వికాసాన్ని కలుగజేయగలగటాన్ని జాతిగత స్వభావంగా కలిగిన ఐరోపాలో ఆ ఆలోచనావిధానం జనించి తదనుగుణమైన కాపిటలిస్టు విప్లవాలు వచ్చాయి.

సరిగా ఇదే సూత్రం కమ్యూనిజం విషయంలో కూడా వర్తిస్తుంది.సమాజ వికాసం పేరుతో సామాజిక శక్తులు అంటే సామాజికమైన ఉత్పత్తివనరులను తమ గుప్పిట్లో పెట్టుకున్న కొందరు స్వార్థపరులు పేదప్రజలను దోపీడీ చేస్తుండటంతో సమాజవికాసమే ఒక సమస్యగా పరిణమించి వ్యక్తి ప్రయోజనం ప్రమాదంలో పడినపుడు వ్యక్తి ప్రయోజనాలకొరకు సామాజిక శక్తులకు, సామాజిక ప్రయోజనాలకు వ్యతిరేకంగా జరిగే విప్లవాలు, పోరాటాలు సమాజ వికాసాన్ని పెంపొందించడమే జాతిగత స్వభావంగా కలిగిన పశ్చిమ ఐరోపా జాతులలో ఎలా ఏర్పడతాయి?. వ్యక్తి ప్రయోజనాన్ని కాపాడే తత్వాన్ని జాతిగత స్వభావంగా కలిగిన రష్యాలో ఆ మహత్తర కమ్యూనిష్టు విప్లవం (October Revolution) సంభవించింది.

ఈ సమయంలో చెప్పుకోవలసిన విషయం ఒకటి ఉన్నది. అదేమంటే ‘మనుషలంతా ఒక్కటే’అనే భావన నేటి ఆదర్శం, నేటి నీతి. మరి ఈ వివిధ జాతులు వివిధ జాతిగత స్వభావాలను కలిగి ఉంటాయనేది ఎంతవరకు నిజం?

మనుషులు మతం పేరుతో, జాతి పేరుతో, ప్రాంతాల పేరుతో, శరీర వర్ణం పేరుతో ఒకరినొకరు ద్వేషించటానికి, నాశనం చేసుకోవటానికి పూనుకున్నపుడు దానికి ప్రతిక్రియగా ‘మనుషలంతా ఒక్కటే’లాంటి నీతులు పుట్టాయి. కానీ ఈ వైషమ్యాలను కాసేపు పక్కన పెట్టి చూస్తే ఈ విశాల ప్రపంచంలో ఉన్న అనేక జాతులలో మౌలికంగా ఆలోచనావిధానంలోగానీ, జీవనవిధానంలోగానీ, తాత్వికచింతనలోగానీ మార్పు ఉన్నది. దానికి కారణం ఆయా జాతులలో ప్రతి ఒకటి తనదైన స్వభావాన్ని కలిగి ఉన్నది. రోజువారీ జీవితంలో విడివిడి వ్యక్తుల ప్రవర్తన వారు ఏ జాతికి చెందిన వారైనా బాహ్యదృష్టికి ఒక్కలాగే ఉంటుంది. కానీ విశాల దృష్టితో చూచినపుడు అంటే ఒక జాతి మొత్తాన్ని సుధీర్ఘకాలంలో దానియొక్క మనుగడను పరిశీలిస్తే ఆ జాతికే విశిష్టమైన ఒకానొక ప్రవర్తనావిధానం, పోకడ, తీరుతెన్ను ఉంటాయి.దానికి కారణం ఆ జాతికి తనదైన జాతిగత స్వభావం ఉండటమే.

ఫ్రాచ్యము-పాశ్చాత్యము (East and West)

ఇప్పుడు తూర్పు మరియు పశ్చిమ దేశాల మధ్యగల తేడాలను స్థూలంగా ఒకసారి పరిశీలిద్దాం. ప్రాచ్య దేశాల (Asian Countries)లో పారమార్థిక చింతన అధికంగా ఉంటుంది. ప్రపంచంలోని ప్రసిద్ధ మతాలు ఆసియాలోనే జన్మించాయి. వాటిని స్థాపించిన మహాపురుషులలో బుద్ధుడు నేపాల్‌లో, వర్థమాన మాహావీరుడు, గురునానక్ భారతదేశంలో, కన్‌ఫ్యూషియస్ చైనాలో, జీసస్ దూరప్రాచ్యంలో, జొరాస్టర్ పర్షియాలో జన్మించారు.

ఒక్క పారమార్థిక ధోరణి మాత్రమేకాదు; మధ్య యుగపు ప్రపంచ విజేతలందరూ ఆసియా వారే.

పాశ్చాత్య దేశాల (Westren Countries)లో ఐహిక చింతన అధికంగా ఉంటుంది.ఆధునిక సాంకేతిక విజ్ఞానం ఎక్కువగా యూరోపియన్ జాతులకు చెందిన వ్యక్తులే రూపొందించారు. నేటి పాలనా వ్యవస్థ రూపుసంతరించుకున్నది ఐరోపాలోనే. ప్రజాస్వామ్యం, జాతీయభావం, సామ్యవాదం మొదలైనవి ఐరోపాలోనే జన్మించాయి. నేటి ఆధునిక జీవన విధానం ఐరోపాలోనే రూపుదిద్దుకున్నది.

ప్రపంచంలో ప్రాచ్యము, పాశ్చాత్యము అనేది స్థూలమైన విభజన. సూక్ష్మంగా చూస్తే ఇవే కాక ఇంకా అనేక జాతులు ఉన్నాయి. వీటిలో ప్రతి ఒక్కటి కూడా తనదైన జాతిగత స్వభావాన్ని కలిగి ఉన్నది.

ఈ విధంగా విశాల ప్రపంచంలోని వివిధ జాతులలో ఆయా జాతులు తమతమ జాతిగత స్వభావాలననుసరించి ఒక్కొక్క వ్యవస్థకు అంటే కొన్ని జాతులు ఇస్లాంకు, మరికొన్ని జాతులు కాపిటలిజానికి, అలాగే మరికొన్ని జాతులు కమ్యూనిజానికి ప్రాతినిథ్యం వహించాయి. తమ కనుగుణమైన వ్యవస్థలను తమవంతు వచ్చినపుడు నెలకొల్పాయి.

దీనికనుగుణంగానే సమాజవికాసాన్ని ఉద్దేశించిన లేక సమాజ ప్రయోజనాలను ఉద్దేశించిన కాపిటలిష్టు వ్యవస్థ ఐరోపాలో తలయెత్తినది. ఇది కూడా మానవాళినంతటినీ ఉద్దేశించిన సామాజిక, రాజకీయ వ్యవస్థే. ఈ వ్యవస్థ గురించి చెప్పుకోవటానికి ముందు ఇది తలయెత్తటానికి ముందున్న నేపథ్యం గురించి చెప్పుకోవాలి. అరాచకాన్ని నిరసిస్తూ రాజ్యశక్తికి ప్రాతినిథ్యం వహిస్తూ ఇస్లాం పశ్చిమ ఆసియా, మధ్య ఆసియాలలో తలయెత్తితే మితిమీరిన రాజ్యశక్తికి నిరసనగా సమాజవికాసానికి ప్రాతినిథ్యం వహిస్తూ పెట్టుబడిదారీ వ్యవస్థ ఐరోపాలో తలయెత్తినది. ఐతే ఇస్లాంకు మరియు పెట్టుబడిదారీ సమాజాన్ని నిర్మించబోయే ఐరోపాకు సిద్ధాంతపరంగా ప్రత్యక్ష యుద్ధమేమీ జరగలేదు. ఇస్లాం కూడా ఫ్యూడలిజమేకానీ ఐరోపాలోని ఫ్యూడల్ వ్యవస్థలను కూలదోసి మాత్రమే పెట్టుబడిదారీ వ్యవస్థ జనించినది.

(ఈ రెండు శిబిరాల మధ్యన క్రూసేడులు జరిగినా అవి కేవలం మత ప్రాతిపదికనే తప్ప రాజకీయ సిద్ధాంత పరంగా జరగలేదు. అప్పటికి ఐరోపా ఇంకా చీకటి యుగంలోనే ఉన్నది. పెట్టుబడిదారీ భావజాలం ఆసమయానికి ఇంకా అక్కడ రూపుదిద్దుకోలేదు.)


(మూడు వ్యవస్థలలో కూడా ఒక్క కమ్యూనిజం మాత్రమే కాపిటలిజం మీద ప్రత్యక్షంగా సుద్ధీర్ఘమైన వాదోపవాదాలకు పూనుకున్నది. కాపిటలిజం మాత్రం ఫ్యూడలిజానికి వ్యతిరేకంగా సిద్ధాంతచర్చలు చేసినా అవేవీ కూడా ఇస్లాంకు వ్యతిరేకంగా కాక తమదేశాలలోని భూస్వామ్య వ్యవస్థమీదే కేంద్రీకరింపబడ్డాయి. ఇక ఇస్లాం జనించేటపుడైతే సిద్ధాంతం పరోక్షంగా, తాత్వికంగా, ఆధ్యాత్మికంగా చెప్పబడిందేకానీ ప్రత్యక్షంగా చెప్పబడలేదు.)

ఐరోపాలో భూస్వామ్యవ్యవస్థ

ఐతే ఇస్లామిక్ ఫ్యూడలిజానికి ఐరోపాలో మధ్యయుగాలలో నెలకొన్న ఫ్యూడలిజానికి హస్తిమశకాంతరమైన తేడా ఉన్నది.ఇస్లాంలో రాజు సర్వశక్తిమంతుడు.కానీ ఐరోపా ఫ్యూడల్ వ్యవస్థలో రాజు స్థానిక భూస్వాముల చేతిలో కీలుబొమ్మ. ఎందుకంటే ఇతని చేతిలో సిద్ధ సైన్యం ఉండేది కాదు. యుద్ధ సమయంలో అతనికి కావలసిన సైన్యాన్ని ఈ భూస్వాములు సమకూర్చేవారు.రాజు యొక్క ఈ బలహీనతను ఆసరాగా చేసుకుని స్వార్థపరులైన ఈ భూస్వాములు రాజునుండి అనేక రాయితీలు పొందేవారు.

క్రూసేడ్‌ల సమయంలో ఆసియాలో ఇస్లామిక్ రాజుల తిరుగులేని అధికారాన్ని గమనించిన ఐరోపా రాజులు తమదేశాలలో కూడా అటువంటి నిరంకుశ రాచరిక వ్యవస్థలను ఏర్పరచుకోవాలని కాంక్షించారు. చివరకు నూతనంగా స్థాపించిన వలసలతో వర్తక, వాణిజ్యాలు అభివృద్ధిచెంది సంపన్న మధ్య తరగతి ఆవిర్భవించడంతో వీరిసహాయంతో ఐరోపా రాజులు భూస్వాముల పీచమణచి నిరంకుశ రాచరికాలను (Enlightened Despotism) స్థాపించారు.

కానీ కాలక్రమంలో ఒకనాడు భూస్వాములను అణచడానికి రాజుకు సహాయంగా నిలబడిన ఈ అవకాశవాద బూర్జువా (సంపన్న మధ్యతరగతి) వర్గం వారి పీడ విరగడవ్వగానే ఈ నిరంకుశ రాచరికాలకు వ్యతిరేకంగా విప్లవం లేవదీసి పెట్టుబడిదారీ వ్యవస్థకు రాజకీయ రూపమైన పార్లమెంటరీ ప్రజాస్వామ్యవ్యవస్థను క్రమంగా నెలకొల్పింది.

ఇప్పుడు ఐరోపాలో సామాజిక వికాసం ఎలా సంభవించినదీ మరియూ ఆ వికాసం పెట్టుబడిదారీ వ్యవస్థకు దారితీసి అది ప్రపంచమంతా ఎలా వ్యాప్తి పొందినదీ అనే విషయాన్ని సవివరంగా పరిశీలిద్దాం.......(సశేషం)

హోమ్‌పేజి

భారతదేశానికి ఎటువంటి వ్యవస్థ కావాలి..?!---5

హోమ్‌పేజి

సమస్యగా పరిణమించిన పరిష్కారం

మొదటే చెప్పినట్లుగా ఇస్లాం అనేది అప్పుడు నెలకొన్న సామాజిక పరిస్థితులకు ప్రతిక్రియగా తలయెత్తినది. అప్పట్లో రాజ్యవ్యవస్థ యొక్క ప్రయోజనాలకు విపత్తు వాటిల్లింది. నిజానికి వ్యవస్థలో ‘రాజ్యం’, ‘సమాజం’, ‘వ్యక్తి’ అనే మూడు అంగాలున్నా అప్పటి పరిస్థితుల దృష్ట్యా రాజ్య వ్యవస్థకు మాత్రమే ప్రమాదం వాటిల్లినట్లుగా భావించబడింది. అందువలన సక్రమమైన వ్యవస్థకు మూడింటి ప్రయోజనాలూ సమంగా నెరవేరవలసి ఉన్నా కూడా రాజ్యం యొక్క ప్రయోజనాలను మాత్రమే ప్రధానంగా దృష్టిలో ఉంచుకుని ఇస్లాం ఆవిర్భవించింది.దీనికి అనుగుణంగానే ఇస్లాంలో అతి శక్తివంతమైన రాజ్యవ్యవస్థ ఏర్పడింది.

‘రాజ్యం’ రీత్యా ఇస్లాం అఖండ విజయాలు సాధించినా వ్యవస్థలోని మిగతా అంగాలైన ‘సమాజం’ మరియు ‘వ్యక్తి’ ల యొక్క ప్రయోజనం నెరవేరలేదు.

ఐతే ఈసారి కూడా చరిత్ర పునరావృతమైనది. అరాచక పరిస్థితులలో ‘రాజ్యం’ యొక్క ప్రయోజనాలు మాత్రమే ప్రమాదంలో పడినట్లుగా ఏవిధంగా భావించబడిందో అదేవిధంగా ఇస్లామిక్ వ్యవస్థలో ‘సమాజం’ యొక్క ప్రయోజనాలు మాత్రమే ప్రమాదంలో పడినట్లుగా గోచరించింది.

‘వ్యక్తి’ ప్రయోజనాలు మరుగున పడటం ఇక్కడ ఒక దోషమైతే ‘రాజ్యం’ ఒక దోషిగా ఆవిష్కృతమైనది. అంటే ‘వ్యక్తి’ ప్రయోజనాలు ఇంకా తెరమీదకు రాలేదు. ‘రాజ్యం’ ప్రయోజనాలు తెరమరుగయ్యాయి. ‘సమాజం’ యొక్క ప్రయోజనాలు కొత్తగా తెరమీదకు వచ్చాయి. ఇక్కడ రాజ్యమే ఒక సమస్యగా పరిణమించింది. అరాచకం ఒక సమస్య ఐనపుడు దానికి పరిష్కారంగా ‘రాజ్యం’ ఆవశ్యకత గుర్తించబడినది. కానీ అదే ‘రాజ్యం’ మితిమీరినపుడు పూర్తిగా వ్యతిరేకించబడినది. స్వయంగా తానే ఒక సమస్యగా గుర్తించబడింది.

ఇస్లాంలో శక్తివంతమైన రాజ్యవ్యవస్థ నాణానికి ఒక పార్శ్వమైతే, అది సామాజిక వికాసాన్ని మరియు వ్యక్తి స్వేచ్ఛను నిర్లక్ష్యం చేయటం రెండవ పార్శ్వం. వాస్తవానికి సమాజం, వ్యక్తి అనే రెండు అంగాలూ నిర్లక్ష్యం చేయబడ్డా బాహ్యదృష్టికి సమాజం ప్రయోజనాలు మాత్రమే ప్రమాదంలో పడినట్లుగా గోచరించినది. రాజ్యం యొక్క మితిమీరిన అధికారం వలన, నిర్బంధం వలన సమాజం యొక్క వికాసం కుంటుపడింది. అధికారం రాజ్యం యొక్క లక్షణమైతే, అభ్యుదయం సమాజం యొక్క లక్షణం. వికాసమే సమాజానికి కావలసినది. ఐతే రాజ్యం యొక్క మితిమీరిన చర్యలవలన సమాజవికాసానికి అది విపత్తుగా పరిణమించింది.దీనితో ఒకప్పుడు రాజ్యాన్ని పరిష్కారంగా గుర్తించిన ప్రతిక్రియాత్మకమైన మానవదృష్టికి ఇప్పుడు అదే రాజ్యం ఒక సమస్యగా గోచరమైనది.

అరాచకమనే సమస్యకు పరిష్కారంగా రాజ్యశక్తి నిర్మాణాన్ని ఇస్లాం ప్రతిపాదించి ఆచరించి చూపింది. కానీ కాలగతిలో ఆచరణలో రాజ్యశక్తే ఒక సమస్యగా, ఒక పీడగా పరిణమించినది. ఇస్లాంలో వడ్డీ వ్యాపారం చేయకూడదు, పరులను హింసించకూడదు, పరులను హత్యచేయకూడదు, దయతో మెలగాలి లాంటి సమాజాన్ని మరియు తోటి మనిషిని ఉద్దేశించిన బోధనలున్నాయి. ఐతే తాత్వికంగా ఇస్లాం రాజ్యశక్తిని మాత్రమే ఉద్దేశించినది. కనుకనే వ్యవస్థలోని మిగతా అంగాలైన సమాజం మరియు వ్యక్తిలకేమీ ప్రయోజనం సమకూరలేదు. పైగా ఆయా అంగాలు మితిమీరిన రాజ్య శక్తివలన ప్రమాదంలో పడ్డాయి.

ఇస్లాం యొక్క మౌలిక సిద్ధాంతాలు తప్ప ఇస్లామిక్ పాలనలో రాజ్యాంగమంటూ ఏమీ ఉండదు. ‘రాజ్యాంగం’ అనేది తదనంతరకాలంలో రూపుదిద్దుకున్న భావన. అంతా రాజు యొక్క వ్యక్తిగత ఇష్టాయిష్టాలమీదే ఆధారపడి పరిపాలన జరిగేది. న్యాయపరమైన, సైనికపరమైన, పరిపాలనాపరమైన అన్ని అధికారాలూ రాజు చేతిలోనే ఉండేవి. అతను ఇతరులనుండి సలహాలు తీసుకున్నా అది నామమాత్రమే.అంతిమ నిర్ణయం రాజుదే. శిరచ్ఛేధం, కాళ్ళు చేతులు నరికి వేయటం, రాళ్ళతో కొట్టి చంపడం, బతికి ఉండగా చర్మం వలిపించటం లాంటి క్రూరమైన శిక్షలు సాధారణంగా అమలవుతుండేవి.

ఇస్లాంకి పూర్వం ప్రపంచంలో రాజ్యపాలన పారమార్థిక చింతనతోకూడిన మతం యొక్క, మతపెద్దల యొక్క బోధనల ప్రభావంతో సాగుతుండేది. కానీ ఇస్లాంలో ఐహిక విషయమే మతం స్థాయికి తీసుకురాబడినది. అల్లా ఒక్కడే దేవుడు, అందరూ అతనికి మాత్రమే విధేయులై ఉండాలి, విగ్రహారాధన చేయకూడదు-అనేదే ఇస్లాం అనే ఉద్యమానికంతటికీ మౌలిక సూత్రం. తరచి చూస్తే ఈ సూత్రం ఐహికమైనదే కానీ పారమార్థికమైనది కాదు. అది రాజ్యశక్తినే సూచిస్తున్నది. దాని యెడల విధేయతనే ప్రతిపాదిస్తున్నది. ఇస్లామిక్ దాడులు, ఆక్రమణలు, బలవంతపు మతమార్పిడులు, పరిపాలన అంతా ఈ సూత్రం కొరకే, దాని ప్రేరణతోనే, అది ఇచ్చిన ఆవేశంతోనే జరిగాయి. ఇస్లాం అరాచకం మీద కత్తిగట్టింది. దానిమీద విజయం సాధించింది. పటిష్ఠమైన రాజ్యశక్తిని నిర్మించినది. ఆ ఊపులో అది సమాజాన్ని, వ్యక్తిని విస్మరించింది.

వికాసానికి తగిన స్వేచ్ఛను కలిగి ఉండడమే ‘సమాజం’ యొక్క ప్రయోజనం. ఆ మేరకు సమాజం మీద ‘రాజ్యం’ యొక్క నియంత్రణ సడలింపబడాలి. ‘వ్యక్తి’ ప్రయోజనమేమిటంటే సమాజాన్ని తన శ్రేయస్సుకు అనుగుణంగా వ్యవస్థీకరించడం లేక తన శ్రేయస్సు కు అనుకూలంగా ఉన్న సమాజంలో జీవించడం. బాహ్యాంతర్గత విద్రోహ శక్తులనుండి ఈ రెంటినీ కాపాడటమే, ఈ రెండు పరిస్థితులు నెలకొనేటట్లు చూడటమే ‘రాజ్యం’ యొక్క కర్తవ్యం మరియు దాని యొక్క ప్రయోజనం. మితమైన రాజ్య శక్తి మాత్రమే ఈ కర్తవ్యాన్ని నెరవేర్చగలదు. అట్లుగాక రాజ్యశక్తి కొరవడినా లేక మితిమీరినా ఇది నెరవేరదు. ఇస్లాంలో రెండవ పరిస్థితి ఏర్పడింది.

వ్యాపార వాణిజ్యాల్లాంటి పరస్పర చర్యలు, నాగరికతా వ్యాప్తే సమాజ వికాసానికి ఆయువుపట్టు. నిరంతరం యుద్ధాలతో అల్లకల్లోలంగా ఉండే ఆనాటి పరిస్థితిలో సమాజం వికసించలేకపోయింది. వ్యాపార వాణిజ్యాలన్నీ సమాజ వికాస దృష్టిలేని నిరంకుశ రాజుల కరకు శాసనాలకు విధేయత చూపుతూ ఆ పరిమితిలోనే జరిగేవి. నాడు ప్రజాజీవితాన్ని రాజ్యం డామినేట్ చేసింది. నిరంతరం మారే రాజ్యపు సరిహద్దులు, నిరంతరం శత్రుదాడులు, యుద్ధాలు, ఆక్రమణలు. యుద్ధసమయంలో సైనికులు ప్రజల ధన, మాన, ప్రాణములను కొల్లగొట్టేవారు. ఇటువంటి పరిస్థితిలో సమాజవికాసానికి అవకాశమేలేదు. ఇస్లాం అనేది వ్యవస్థీకృత ఫ్యూడలిజం. ఇది అరాచకాన్ని అణచి ప్రపంచానికి పటిష్ఠవంతమైన, చక్కటి రాజ్యశక్తినందించి ఎంత మేలు చేసిందో, అదే రాజ్య శక్తి మితిమీరటం వలన, కేవలం దానిమీదే దృష్టి పెట్టబడటం వలన ‘సమాజం’, ‘వ్యక్తి’ నిర్లక్ష్యం చేయబడటం వలన మానవాళికి అంతే హానికరంగా పరిణమించింది. ఫ్యూడలిజం(ఇస్లాం)లో ప్రధానంగా ‘సమాజం’ మీద ప్రత్యక్ష దాడి జరిగినది. దానితో ‘సమాజం’ ప్రమాదంలో పడినట్లుగా భావించబదింది.

దీనితో మానవుడు రాజ్యశక్తికి వ్యతిరేకంగా, సమాజ వికాసానికి అనుకూలంగా ఆలోచించటం ప్రారంభించాడు. రాజ్యాన్ని సంకెలగా భావించాడు. ఈ ఆలోచనలే పెట్టుబడిదారీ వ్యవస్థ (Capitalism) కు బాటలు పరిచాయి. ఈ పెట్టుబడిదారీ ప్రజాస్వామ్య వ్యవస్థకు మౌలిక సిద్ధాంత గ్రంథం రూసో అనే తత్వవేత్త రచించిన ‘సోషల్ కాంట్రాక్ట్ ’ (Social Contract) అనే గ్రంథం. ఈ గ్రంథమే ‘ఫ్రెంచ్ విప్లవం ’(French Revolution)నకు ప్రేరణగా నిలచినది.

ఈ గ్రంథం ప్రకారం రాజ్యం అనేది ఒక 'సామాజిక ఒడంబడిక ’ (Social Contract). ఫ్యూడల్ వ్యవస్థలో రాజ్యం 'దైవదత్తమైన అధికారం’(Devine Right of The Emperor) గా భావించబడింది. ఈ భావనకు వ్యతిరేకంగా ఈ గ్రంథంలో రాజ్యం ఒక సామాజిక ఒడంబడిక గా భావించబడింది. ఒడంబడిక అనేది ఇరువురు సమానస్థాయి వారి మధ్యన జరుగుతుంది. అంటే రాజు ప్రజలకన్నా ఏ విధంగానూ గొప్పవాడు కాదనీ, వారితో సమాన స్థాయి కలవాడేననీ, అతనికి ఎటువంటి దైవత్వం లేదనీ భావన. మరొక విషయం ఏమంటే రాజుకి ఆ అధికారం ప్రజలు అతనితో ఒప్పందం చేసుకోవటం వలననే సంక్రమించినది కనుక ఆ అధికారం ప్రజలు ఇచ్చినదేకాని అది దైవదత్తమైనది కాదు అని కూడా భావన.

ఈ గ్రంథం యొక్క ప్రారంభ వాక్యం చాలా ప్రసిద్ధమైనది. ‘మానవుడు స్వేచ్ఛగా జన్మించాడు. కానీ ఎక్కడ చూచినా సంకెళ్ళతోటే కనిపిస్తున్నాడు’ అనేదే ఆ వాక్యం. ఈ సంకెలలు మితిమీరిన రాజ్యశక్తిని ఉద్దేశించినవే కానీ మరేవీ కావు.

‘ఫ్రెంచ్ విప్లవం’ పెట్టుబడిదారీ వ్యవస్థ కొరకు, రాచరిక వ్యవస్థలకు వ్యతిరేకంగా జరిగిన విప్లవాలలోకెల్లా అతిముఖ్యమైనది మరియు అత్యంత ప్రాముఖ్యత కలిగినది. ఇది ఫ్రాన్స్ దేశంలో 1789వ సం||లో సంభవించినది. ఈ విప్లవ సమయంలోనిదే అత్యంత ప్రసిద్ధి పొందిన నినాదం ‘స్వేచ్ఛ’, ‘సమానత్వం’, ‘సౌభ్రాతృత్వం’ (Liberty, Equality, and Fraternity). పెట్టుబడిదారీ దేశాలకు చెందిన జాతీయ పతాకాలలోని (మన తిరంగా కూడా) త్రివర్ణాలకు ఈ మూడు మాటలే ప్రతీకలు. ఈ మూడు భావాలు కూడా రాజ్యశక్తికి వ్యతిరేకంగా రూపొందినవే. రాజ్యం వలన స్వేచ్ఛ గానీ, సమానత్వంగానీ, సౌభ్రాతృత్వం గానీ లభించటంలేదని భావించబడింది. కనుక వీటి కొరకు ఆ రాజ్యశక్తి అపరిమితంగా ఉండే రాచరికాలను కూలదోసి సమాజవికాసానికి దారితీసే పెట్టుబడిదారీ వ్యవస్థలను ఏర్పరచాలని భావించబడింది.....(సశేషం)

హోమ్‌పేజి